დღეს, 21 სექტემბერს, პარტია „ლელომ“ ბათუმის ოფისში უკრაინელ დევნილებთან ერთად ბრიფინგი გამართა. პარტიის წარმომადგენლები და ომსგამორიდებული უკრაინელები ითხოვენ „ქართული ოცნების“ ხელისუფლებამ 24 თებერვლის შემდეგ საქართველოში შემოსული უკრაინელები ჩააყენოს თანაბარ მდგომარეობაში.
პირველი აგვისტოდან საქართველოს ხელისუფლებამ გამოყო ყოველთვიური 300 ლარიანი დახმარება უკრაინელთა იმ ოჯახებისთვის, რომლებიც სახელმწიფოს მიერ გამოყოფილ სასტუმროებში უსასყიდლოდ ცხოვრობდნენ. ის ოჯახები, რომლებსაც ასეთ სასტუმროებში არ უცხოვრიათ, დახმარების გარეშე და, შესაბამისად, მძიმე მდგომარეობაში დარჩნენ.
ბათუმის „ლელოს“ ოფისში დღეს ბრიფინგზე მოითხოვეს, სახელმწიფომ გასცეს 300 ლარიანი დახმარება უკრაინიდან დევნილ თითოეულ ოჯახზე და არა მხოლოდ მათზე, ვინც სახელმწიფოს მიერ დაფინანსებული სასტუმროებით სარგებლობდა:
„მიგვაჩნია, რომ ეს „ქართული ოცნების“ კიდევ ერთი ფასადური გადაწყვეტილებაა – უკრაინიდან დევნილი მოსახლეობისთვის 300 ლარიანი დახმარების გამოყოფა, მხოლოდ საერთაშორისო საზოგადოებისთვის თვალის ახვევის მცდელობაა და მეტი არაფერი, რადგან ამ კომპენსაციით უკრაინის მხოლოდ ის მოქალაქეები სარგებლობენ, რომლებიც სახელმწიფოს ხელშეწყობით (და ჩვენი ზეწოლით) იყვნენ განთავსებული სხვადასხვა სასტუმროში.
ასეთი კი აჭარაში 200-მდე ოჯახია, რეალურად ჩვენს რეგიონში გაცილებით მეტი დევნილი საჭიროებს დახმარებას და ამ ე.წ. ხრიკით ოცნება საერთაშორისო იმიჯის შენარჩუნებას ცდილობს. საქმე ისაა, რომ როდესაც ეს გადაწყვეტილება გამოქვეყნდა, არსად მითითებული არ იყო, რომ მხოლოდ ამ სახის ოჯახებზე გაიცემოდა დახმარება”, – წერია პარტია ,,ლელოს” მიერ გავრცელებულ განცხადებაში.
პარტია „ლელოს” წარმომადგენელთა ინფორმაციით, მონაცემთა ბაზაში დღემდე არეგისტრირებენ იმათ, ვისაც არ უსარგებლია სახელმწიფოს მიერ შეთავაზებული საცხოვრისით.
