თეთრ სახლში ფიქრობენ, რომ ირანისგან დრონების მიღების შემდეგ, რუსეთმა შესაძლოა, მილიონობით ჭურვი და რაკეტა ჩრდილოეთ კორეისგან იყიდოს. ეს კიდევ ერთხელ ადასტურებს, საბრძოლო მასალების როგორ დეფიციტს განიცდის რუსეთის არმია.
ამის შესახებ, სააგენტო Reuters-ის ცნობით, თეთრი სახლის სპიკერმა უსაფრთხოების საკითხებში ჯონ კირბიმ განაცხადა. მან აღნიშნა, რომ ჯერჯერობით ვაშინგტონს არ აქვს მტკიცებულება, რომ „შესყიდვა ნამდვილად მოხდა“ და რომ ეს იარაღი უკვე ბრძოლის ველზეა.
„ეს აჩვენებს, როგორ დააზარალა რუსეთის სამხედრო წარმოება ომმა. ასევე აჩვენებს კრემლის სასოწარკვეთის ხარისხს, რადგან დახმარებისთვის მიმართავს ისეთ ქვეყნებს, როგორებიც ირანი და ჩრდილოეთ კორეაა,“ – ამბობს კირბი.
სახელმწიფო დეპარტამენტის წარმომადგენლის, ვედანტ პატელის თქმით, რუსეთის განზრახვა, შეისყიდოს საბრძოლო მასალები, მიუთითებს, რომ რუსეთს „ძალიან უჭირს მარაგების შევსება უკრაინაში, ნაწილობრივ საექსპორტო კონტროლისა და სანქციების გამო“.
სამხედრო-პოლიტიკური მიმომხილველი ოლექსანდრ კოვალენკო, რომელსაც ამ საკითხზე უკრაინის 24-ე არხმა კომენტარი სთხოვა, განმარტავს, რომ დღეისთვის არსებობს ჩრდილოეთ კორეიდან შეიარაღების მიღების ერთადერთი ლოგისტიკური შესაძლებლობა – სარკინიგზო ხიდი, რომელიც ჩრდილოეთ კორეას რუსეთთან აკავშირებს. შესაბამისად, ასეთი გარიგება რომ შემდგარიყო, შეუძლებელი იქნებოდა დაზვერვის სამსახურებს არ შეენიშნათ ჩრდილოეთ კორეიდან რუსეთისკენ მიმავალი უამრავი ეშელონი.
კოვალენკო ფიქრობს, რომ რუსეთი, ჯერჯერობით, საბრძოლო მასალების დეფიციტს ბელარუსის ტერიტორიაზე არსებული საწყობებიდან ავსებს.
„რუსეთის სარდლობას სრული წვდომა აქვს ამ ობიექტებზე. მხოლოდ აგვისტოში ბელარუსის ტერიტორიიდან 12 ათასი ტონა საბრძოლო მასალები გაიტანეს. ეს დადასტურებული ფაქტია და არა ჭორი,“ – ამბობს კოვალენკო.
30 აგვისტოს ამერიკულმა გამოცემა The Washington Post-მა გაავრცელა ინფორმაცია, რომ ირანმა რუსეთს დამრტყმელი დრონების პირველი მსხვილი პარტია გადასცა უკრაინაში გამოსაყენებლად.
გამოცემის თანახმად, რუსეთის სატვირთო თვითმფრინავებმა ჯერ კიდევ 19 აგვისტოს წაიღეს ირანიდან Mohajer-6 და Shahed სერიის ორი ტიპის ლეტალური უპილოტო საფრენი აპარატები, რომლებსაც რადარებზე, არტილერიასა და სხვა სამხედრო სამიზნეებზე დასარტყმელად საბრძოლო მასალების გადატანა შეუძლიათ.
