ნეტგაზეთი • RU

ბეშუმი და მწვანე ტბა – დანაგვიანებული კურორტები

კურორტ „ბეშუმის“ და მწვანე ტბის ახლოს მცხოვრები მოსახლეობა ტერიტორიების დაბინძურებაზე საუბრობს. მათი თქმით, გარშემო ყველაფერი დანაგვიანებულია განსაკუთრებით სახალხო ზეიმ „შუამთობაზე“ – ამ დღეებში ხალხის რაოდენობა იზრდება, ნაგავს კი იქვე ყრიან, სადაც მოესურვებათ.

თორნიკე აბულაძე აქტივისტია. ის ბეშუმში ცხოვრობს და ამბობს, რომ ბეშუმში კიდევ უფრო მეტადაა დაბინძურებული კურორტის ცენტრალური ნაწილები.

მისი თქმით, მდინარე, რომელიც ბეშუმის ცენტრთან ახლოს ჩამოდის, უკვე წლებია დაბინძურებულია პოლიეთილენის პარკებით, ბოთლებით თუ სხვა ნარჩენებით. ის ამბობს, რომ ბეშუმში არასდროს შეუნიშნავს დასუფთავების სამსახურს ხულოში მდინარის გაწმენდაზე ეზრუნოს.

„ბეშუმის ცენტრში არ არის პატარა ბუნკერები, რომლებიც სეირნობისას შეიძლება გამოიყენოს აქაურმა დამსვენებელმა.

ბეშუმის ცენტრალურ ნაწილს ასუფთავებენ, თუმცა შუამთობის დროს ბევრი ხალხია და დანაგვიანებაც მაღალია. ნაგვის ურნებთან კი კიდევ უფრო მეტი ნაგავი გროვდება. [ნაგავი] არ ეტეოდა ურნებში და გატანასაც ვერ ახერხებდა დასუფთავების სამსახური“, – გვითხრა თორნიკემ.

თორნიკემ ისიც გვითხრა, რომ დაბინძურებულია გოდერძის უღელტეხილის მიმდებარე იაილებთან ჩამომავალი მდინარეებიც. ფიქრობს, რომ ამას იაილებში  ნაგვის ურნების არარსებობა იწვევს.

„პრობლემაა ისიც, რომ ხულოდან მომავალ გზაზე ბეშუმამდე საერთოდ არსადაა ნაგვის ურნა, რომ ტურისტმა გააჩეროს [მანქანა] და ნაგავი სანაგვე ურნაში ჩაყაროს“.

მდინარე ბეშუმთან. ფოტო/თორნიკე აბულაძე

კურორტი ბეშუმი. ფოტო/თორნიკე აბულაძე

ბეშუმის მიმდებარე ტერიტორია. ფოტო/თორნიკე აბულაძე.

მდინარე ბეშუმთან. ფოტო/თორნიკე აბულაძე

ხატია კოჩალიძე ლეკიძირში ცხოვრობს. ეს იაილა მწვანე ტბასთან ახლოს მდებარეობს. შესაბამისად, ხატია და ლეკიძირის მოსახლეობა ხშირად გადადის ტბაზე.

ხატიამ გვითხრა, რომ მწვანე ტბის მიმდებარე ტერიტორია ძირითადად დანაგვიანებულია.

„იქ [მწვანე ტბაზე]  ნაგვის 4 ურნა დგას, მაგრამ თვეში ერთხელ ან ორჯერ მოდის მანქანა ნაგვის გასატანად. სამწუხაროდ, ურნები არ არის საკმარისი და ყველგან ნაგავია დაყრილი“, – გვიყვება ხატია.

„სადაც სპორტული შეჯიბრებები ეწყობა [ფეხბურთის მოედანზე], იქ აწყობენ გარე ვაჭრობასაც და რახან ნაგვის ურნები არ არის, ნაგავს ძირში ყრიან.

[შუამთობაზე] ერთ გოგოსთან კამათიც კი მომივიდა. ვუთხარი, რომ ქვებში არ ჩაყაროთ ნაგავი-მეთქი და აი, აბა სად წავიღოო?

შუამთობამდეც და მანამდეც იყო დანაგვიანების პრობლემა მწვანე ტბაზე და მიმდებარედ. შუამთობაზე კი გარევაჭრობები მოეწყო და უარესად დანაგვიანდა იქაურობა“, – ამბობს ხატია.

ხატიამ გვითხრა, რომ მეზობლებს შუამთობის დასრულების შემდეგ ფეხბურთის მოედნისა და მწვანე ტბის ტერიტორიების ერთად დასუფთავება შესთავაზა: „[შუამთობაზე] ყოველ წელს ყრიან ნაგავს და აი, მობეზრდა მოსახლეობასაც. ყოველ წელს მოდიან, ანაგვიანებენ და თავიანთი ნაგავი არ გააქვთ“.

ხატია ფიქრობს, რომ საჭიროა ნაგვის ურნების დამატება და ასევე, ნარჩენების ოპერატიულად გატანა.

„საკმაოდ დიდ პრობლემას ქმნის დანაგვიანება. პირუტყვი ამ ნაგავს ჭამს და ეს ძალიან ცუდია.

შუამთობის პერიოდში ყოველ წელსაა ეს პრობლემა. ადრე არ იყო ნაგვის ურნები. ახლა არის და მაინც იგივე პრობლემაა“.

მწვანე ტბა. ფოტო/ხატია კოჩალიძე.

მწვანე ტბის მიმდებარე ტერიტორია. ფოტო/ხატია კოჩალიძე.

მწვანე ტბის მიმდებარე ტერიტორია.

მწვანე ტბის მიმდებარე ტერიტორია.

ხულოს მუნიციპალური სერვისის დირექტორი, დიმიტრი შავაძე, ამბობს, რომ მთაში საზაფხულო სეზონის დაწყებისას ნაგავი დაახლოებით 3-4 დღეში ერთხელ გააქვთ. „ახლა, აქტიურ სეზონზე, ყოველ მეორე დღეს დავდივართ და გაგვაქვს ნაგავი. გუშინ გვყავდა სანდასუფთავების მანქანა ბეშუმში და მწვანე ტბაზე“.

დიმიტრი შავაძის თქმით, ბეშუმის დასუფთავებას კურორტის დირექცია უზრუნველყოფს, ხოლო მწვანე ტბისა და გოდერძის უღელტეხილის დასუფთავებაზე ხულოს მუნიციპალური სერვისი ზრუნავს.

„ერთი თანამშრომელი მწვანე ტბაზეა, ერთი გოდერძის უღელტეხილზე. ისინი ყოველდღიურად ასუფთავებენ ცენტრებს [მწვანე ტბის და გოდერძის უღელტეხილის] დილის საათებში“, – გვითხრა დიმიტრი შავაძემ.

ნეტგაზეთის მასალების სხვა გამოცემებში გადაბეჭდვის წესი
ავტორი