ნეტგაზეთი • RU

I ადგილზე უკრაინა, II ადგილზე საქართველო – ჭადრაკის ოლიმპიადის ქალთა გუნდების შედეგები

ინდოეთში, ჩენაიში მიმდინარე საჭადრაკო ოლიმპიადაზე საქართველოს ქალთა ნაკრებმა მეორე ადგილი დაიკავა.

პირველი ადგილი და ოლიმპიური ოქრო უკრაინის ქალთა ნაკრებმა მიიღო.

შედეგების გამოცხადებამდე ჯერ კიდევ უცნობი იყო, ვინ გავიდოდა პირველ ადგილას, საქართველოს თუ უკრაინის ქალთა ნაკრები, რადგან ორივე ნაკრებმა დღეს მატჩები მოიგო ანგარიშით – 3:1. დღეს, 9 აგვისტოს, საქართველოს ქალთა ნაკრებმა ამ ანგარიშით დაამარცხა აზერბაიჯანის ნაკრები, ხოლო უკრაინის ნაკრებმა ამავე ანგარიშით სძლია პოლონეთის ნაკრებს.

საბოლოოდ, დამატებითი მაჩვენებლების შეჯამების შემდეგ, ოლიმპიური ოქრო უკრაინის ნაკრებმა მიიღო.

გამოცემა chess-news-ი ფეისბუქზე წერს, რომ ეს მეორე შემთხვევაა, როცა საქართველოსა და უკრაინის ქალთა ნაკრებებმა ერთნაირი ქულები დააგროვეს საჭადრაკო ოლიმპიადაზე. ასე მოხდა 2008 წელს დრეზდენში გამართულ საჭადრაკო ოლიმპიადაზე. მაშინ პირველ ადგილზე საქართველოს ქალთა ნაკრები გავიდა.

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.