„აზოვსტალის“ დამცველთა ოჯახები წითელი ჯვრის კომიტეტსა და გაეროს მიმართავენ და სთხოვენ, შეაჩერონ „აზოვის“ მებრძოლების საჩვენებელი ტრიბუნალი, რომელსაც რუსები მარიუპოლში გეგმავენ.
ტყვეობაში მყოფი უკრაინელი მებრძოლების ოჯახები აღნიშნავენ, რომ საჩვენებელი სასამართლო „სამხედრო ტყვეების მიმართ მოპყრობის საერთაშორისო კანონებს ეწინააღმდეგება“.
„საერთაშორისო ტრიბუნალი შეუძლებელია „რესპუბლიკაში“, რომელიც მხოლოდ ისეთმა ფსევდოსახელმწიფოებმა აღიარეს, როგორებიც აფხაზეთი და სამხრეთ ოსეთია. მზადდება პროპაგანდისტული შოუ და სადაც გინდა გაიმართოს ის – დონეცკში თუ მარიუპოლში, მას მსოფლიოში არავინ აღიარებს. უკრაინელი სამხედროები, რომლებიც კანონით განსაზღვრულ მოვალეობებს ასრულებდნენ უკრაინის ტერიტორიაზე, არ შეიძლება სხვა სახელმწიფომ გაასამართლოს, მით უმეტეს, თვითაღიარებულმა ფსევდოსახელმწიფომ. ასეთ „ტრიბუნალს“ ვერანაირი ძალა ვერ ექნება უკრაინის სამართლებრივ სივრცეში“, – ნათქვამია „აზოვსტალის“ დამცველთა ოჯახების ასოციაციის განცხადებაში.
ასოციაცია მიმართავს უკრაინის პრეზიდენტს, ვოლოდიმირ ზელენსკისა და საერთაშორისო ორგანიზაციებს, კერძოდ კი, „აზოვსტალის“ დამცველების გარანტებს, წითელი ჯვრის საერთაშორისო კომიტეტს, გაეროს და სთხოვს, ხელი შეუშალონ ყალბი ტრიბუნალის გამართვას.
მარიუპოლის მერმა, ვადიმ ბოიჩენკომ, 6 აგვისტოს გაავრცელა ინფორმაცია, რომ რუსები სექტემბერში უკრაინის დამცველების წინააღმდეგ საჩვენებელი სასამართლოს გამართვას აპირებენ. მისი თქმით, ამისთვის რუსი ოკუპანტები მარიუპოლის ფილარმონიის სცენაზე რკინის გალიებს აწყობენ.
ფოტოები ვადიმ ბოიჩენკოს ტელეგრამ არხიდან
მოგვიანებით, დონეცკის თვითგამოცხადებული რესპუბლიკის მეთაურმა, დენის პუშილინმა დაადასტურა, რომ მარიუპოლში „აზოველთა“ საჩვენებელი სასამართლო იგეგმება.
უკრაინის სამხედრო დაზვერვა აცხადებს, რომ უკრაინელი სამხედრო ტყვეების ტრიბუნალი საზოგადოების დაშინებისკენაა მიმართული და მას ვერანაირი სამართლებრივი ძალა ვერ ექნება.
რუსეთის ტყვეობაში დაახლოებით 2 500 უკრაინელი სამხედრო ტყვეა, რომლებმაც მარიუპოლის „აზოვსტალის“ ქარხანა 82-დღიანი ბრძოლის შემდეგ დატოვეს და რუსეთს ჩაბარდნენ.
