ნეტგაზეთი • RU

ბათუმის ცენტრალურ პარკში ჰაერის მონიტორინგის სადგურს განათავსებენ

ბათუმის ცენტრალურ პარკში გარემოს ეროვნული სააგენტო ატმოსფერული ჰაერის დაბინძურების მონიტორინგის ავტომატურ სადგურს განათავსებს. სადგური, რომელიც შეიცავს სხვადასხვა მოწყობილობას, სენდვიჩ პანელისაგან დამზადებულ ჯიხურში იქნება მოთავსებული. სადგური ჰაერის ხარისხს რამდენიმე დამაბინძურებელზე ავტომატურად გააკონტროლებს.

გარემოს ეროვნული სააგენტო ასეთ სადგურს ბათუმის გარდა კიდევ 7 ადგილზე დაამონტაჟებს – თბილისში, რუსთავში, თელავში, ახალციხეში, ქუთაისში, ზუგდიდსა და მესტიაში. სააგენტო ასევე შეიძენს ერთ მობილურ სადგურსაც.

ატმოსფერული ჰაერის დაბინძურების მონიტორინგის რვა ავტომატური სადგურის, აგრეთვე, ატმოსფერული ჰაერის დაბინძურების მონიტორინგის მობილური ავტომატური სადგურის და მისი განსათავსებელი ავტომანქანის სახელმწიფო შესყიდვაზე სააგენტომ ტენდერი 5 582 068 ლარით გამოაცხადა.

პირობის მიხედვით, შესასყიდი ობიექტების [შესაბამისი აპარატურით] მიწოდება – ინსტალაცია/მონტაჟი, როგორც სტაციონარული, ასევე, მობილური სადგურის სრულად გამართული ავტომობილით – უნდა განხორციელდეს ხელშეკრულების გაფორმებიდან არაუმეტეს ერთი წლის განმავლობაში.

ჰაერის მონიტორინგის სადგური ბათუმის ცენტრალურ პარკში / ფოტომონტაჟი ტენდერიდან

ამ დროისთვის ბათუმში მხოლოდ ერთი ავტომატური სადგურია განთავსებული ტბელ აბუსერიძის ქუჩაზე, რესპუბლიკური საავადმყოფოს წინ:

ჰაერის მონიტორინგის სადგური ბათუმში, ტბელ აბუსერიძის ქუჩაზე / ფოტო „ბათუმელების“ არქივიდან

ჰაერის ხარისხის შესახებ ინფორმაცია ყოველდღიურად ქვეყნდება გარემოს ეროვნული სააგენტოს ატმოსფერული ჰაერის ხარისხის პორტალზე. ამ პორტალის მიხედვით, ბათუმში, სხვადასხვა დროს, ჰაერში მტვრის ნაწილაკების შემცველობის მაჩვენებლის შესახებ შეგიძლიათ ნახოთ ამ ბმულზე.

ამავე თემაზე „ბათუმელების“ არქივიდან:

რამდენად დაბინძურებულია ჰაერი ბათუმში – სააგენტოს მონაცემები

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com