24 წლის გ.მ.-ს დამამძიმებელ გარემოებაში განზრახ მკვლელობის მცდელობაში ედება ბრალი. ბრალის დამტკიცების შემთხვევაში მას 16-დან 20 წლამდე, ან უვადოდ თავისუფლების აღკვეთა ემუქრება. პროკურატურა „დამამძიმებელ გარემოებად“ მიიჩნევს იმას, რომ გ.მ. არასრუწლოვნობის პერიოდში ასევე განზრახ მკვლელობის მცდელობისთვის იხდიდა სასჯელს. იგი ადრე ნასამართლევია. ბრალდებული წარდგენილ ბრალს ამჯერადაც აღიარებს.
„უკვე მოვითხოვეთ კვალიფიკაციის შეცვლა, რადგან მიმდინარე წლის იანვრიდან ამოქმედდა „არასრულწლოვანთა მართლმსაჯულების კოდექსი“, რომლის მიხედვითაც არასრულწლოვნობის პერიოდში ჩადენილი დანაშაულისთვის პირი ნასამართლევად არ მიიჩნევა. შესაბამისად, ამ მოტივით მკვლელობის მცდელობას დამამძიმებელი გარემოება აღარ უნდა დაემატოს“, – უთხრა „ბათუმელებს“ აჭარის იურიდიული დახმარების ბიუროს იურისტმა დავით გოგუაძემ, რომელიც გ.მ.-ს ინტერესებს იცავს.
თუკი მოსამართლე დავით მამისეიშვილი დაცვის მხარის პოზიციას გაიზიარებს, გ.მ-ს პატიმრობაში ყოფნა შვიდიდან თხუთმეტ წლამდე მოუწევს.
საქმის მასალების მიხედვით, გ.მ.-მ სიტყვიერი ურთიერთშელაპარაკების დროს ბათუმში, თბილისის მოედანზე, გასული წლის 18 სექტემბერს დანით დაჭრა მისთვის უცნობი პირი. დაზარალებულმა სიცოცხლისთვის საშიში დაზიანებები მიიღო. მისი ჩვენების მიხედვით, ბრალდებულმა მას ქუჩაში, შუაღამისას უმიზეზოდ დაუწყო გინება.
გ.მ. ციხიდან 2013 წელს გამოვიდა. მანამდე ის ოთხი წლის განმავლობაში იხდიდა სასჯელს. დაცვის მხარის მოთხოვნით, ბრალდებულს ჩაუტარდა სასამართლო-სამედიცინო ექსპერტიზა, რომლის მიხედვითაც ბრალდებული ჯანმრთელია. გ.მ. ოზურგეთში ცხოვრობს. პროცესს სასამართლოში ადვოკატისა და პროკურორის გარდა არავინ დასწრებია.
