დიდი ბრიტანეთის დაზვერვა რუსეთის არმიაში კადრების ნაკლებობაზე საუბრობს და ვარაუდობს, რომ ამან შესაძლოა, რუსეთის თავდაცვა აიძულოს, სამხედროთა არატრადიციული დაკომპლექტების მეთოდს მიმართოს.
„ეს გულისხმობს პირადი შემადგენლობის გამოყვანას რუსეთის ციხეებიდან კერძო სამხედრო კომპანია „ვაგნერისთვის“, – წერს უწყება 12 ივლისის რელიზში.
დაზვერვის შეფასებით, თუ ეს ვარაუდი გამართლდება, ის მიუთითებს იმ სირთულეებზე, რომლებსაც რუსეთი დანაკარგების შევსებისას აწყდება.
გაერთიანებული სამეფოს თავდაცვა ჯერ კიდევ ივნისში ამახვილებდა ყურადღებას იმ ფაქტზე, რომ რუსეთი უკრაინაში „ვაგნერის“ დაქირავებულ მფრინავებს იყენებს. უწყების შეფასებით, რუსეთს ამ დროისთვისაც დიდი საბრძოლო დანაკარგი ჰქონდა და სათანადოდ მომზადებული პირადი შემადგენლობა აღარ ჰყოფნიდა.
რაც შეეხება აქტიურ საბრძოლო მოქმედებებს: „რუსეთი აცხადებს, რომ მისმა არმიამ დონეცკის ოლქის ქალაქი გრიგოროვკა დაიკავა. პარალელურად, რუსეთის ძალები განაგრძობენ შეტევას მთავარ გზაზე სლოვიანსკისა და კრამატორსკის მიმართულებით“.
უწყება აღნიშნავს, რომ გადაჯგუფებისა და ხელახალი ფორმირების შემდეგ რუსები, უახლოეს მომავალში, მომდევნო შეტევებისთვის ემზადებიან.
გაერთიანებული სამეფოს თავდაცვა უკრაინაში მიმდინარე მოვლენებზე სადაზვერვო ცნობარს ყოველდღიურად აქვეყნებს. გუშინდელ რელიზში დაზვერვა წერდა, რომ რუსეთის ხელისუფლება, ფაქტობრივად, ყოველგვარი შესვენების გარეშე, აიძულებს პირად შემადგენლობას, დარჩნენ აქტიური საბრძოლო მოქმედებების ზონაში, რაც არმიის მორალურ და ფიზიკურ დაუძლურებას იწვევს.
მთავარი ფოტო: „ვაგნერის“ წევრები სირიაში/ფოტო: Twitter
