დიდი ბრიტანეთის დაზვერვის ცნობით, 10 ივლისს, კვირას, რუსეთის არმია კვლავაც განაგრძობდა საარტილერიო შეტევებს ჩრდილოეთ დონბასში, თუმცა მნიშვნელოვანი წარმატების გარეშე. პარალელურად, უკრაინის ძალებიც განაგრძობდნენ ზეწოლას რუსეთის თავდაცვის ხაზზე ჩრდილო აღმოსავლეთ ხერსონში, თუმცა ტერიტორიული წინსვლისთვის არც მათ მიუღწევიათ.
გაერთიანებული სამეფოს თავდაცვა, დღევანდელ სადაზვერვო ცნობარში, ყურადღებას ამახვილებს რუსეთის არმიის ფიზიკურ და მორალურ მდგომარეობაზე და აღნიშნავს, რომ რუსეთის ხელისუფლება, ფაქტობრივად, ყოველგვარი შესვენების გარეშე აიძულებს პირად შემადგენლობას, დარჩნენ აქტიური საბრძოლო მოქმედებების ზონებში.
დიდი ბრიტანეთის დაზვერვას მაგალითად მოჰყავს ივნისის ბოლოს, ერთ-ერთი რუსულენოვანი სააგენტოს მიერ გამოქვეყნებული ვიდეო, რომელშიც რუსი სამხედროების ცოლები ადგილობრივ პოლიტიკოსს მიმართავდნენ და ქმრების ომიდან დაბრუნებას სთხოვდნენ.
„ერთ-ერთი ქალი ამბობდა, რომ აღმოსავლეთის სამხედრო ოლქის მე-5 ცალკეული სატანკო ბრიგადის პირადი შემადგენლობა „გამოფიტულია ფიზიკურად და მორალურად“, რადგან ისინი აქტიურ საბრძოლო მოქმედებებში 24 თებერვლიდან მონაწილეობენ“, – წერს უწყება და დასძენს, რომ დაგეგმილი შესვენებების გარეშე აქტიურ საბრძოლო მოქმედებებში სამხედროების დატოვება, სხვა საკადრო პრობლემებთან ერთად, სავარაუდოდ, ერთ-ერთი ყველაზე დამაზიანებელი ფაქტორია რუსეთის არმიისთვის.
გაერთიანებული სამეფოს თავდაცვა უკრაინის შესახებ სადაზვერვო ცნობარს ყოველდღიურად აქვეყნებს და საბრძოლო მოქმედებებს აფასებს. გუშინდელ რელიზში უწყება აღნიშნავდა, რომ რუსეთის არმიამ პოპასნაიასთან მცირე ტერიტორიულ წინსვლას მიაღწია.
მთავარი ფოტო: Anadolu Agency
