მთავარი,სიახლეები,ჯანმრთელობა

რა ზიანი მოაქვს ჯანმრთელობისთვის მძიმე ტვირთის ხშირ ტარებას – ტრავმატოლოგის რჩევები

12.07.2022 • 12813
რა ზიანი მოაქვს ჯანმრთელობისთვის მძიმე ტვირთის ხშირ ტარებას – ტრავმატოლოგის რჩევები

 სამუშაო ადგილზე მძიმე ნივთების აზიდვა ტრავმების ერთ-ერთი მთავარი მიზეზია მსოფლიოში. ზედმეტად მძიმე ტვირთის ხელით გადატანის მცდელობა ძლიერ დატვირთვას და სტრესს აყენებს სხეულს, რამაც შეიძლება გამოიწვიოს კუნთების მტკივნეული დაჭიმვა, ან გაცილებით უფრო მძიმე პრობლემები – ხერხემლის ან სახსრების დაზიანებები.

ეს რისკი მხოლოდ ტვირთის ზიდვასთან დაკავშირებულ პროფესიებს არ უკავშირდება, ასეთივე საზიანოა ქალების მიერ ბაზრიდან ოჯახის სამსახურში მოტანილი ტვირთი, ბავშვისთვის შეუფერებლად მძიმე ჩანთის ტარება და ა.შ. ბათუმის სამედიცინო ცენტრის ორთოპედია – ტრავმატოლოგიის მიმართულების ხელმძღვანელი, რაულ პაქსაძე ამბობს, რომ დაზიანება მძიმე ტვირთის ერთჯერადად აზიდვითაც შეიძლება განვითარდეს.

  • ბატონო რაულ, კონკრეტულად რა შეიძლება გამოიწვიოს სიმძიმეების ხშირმა აზიდვამ სამსახურის ან სახლის პირობებში?

როდესაც პროფესიისა თუ სხვა ვითარების გამო ადამიანს ყოველდღიურად უწევს სიმძიმეების აზიდვა, დროთა განმავლობაში მას უვითარდება როგორც ხერხემლის, ისე სახსრების რიგი დაავადებები. მაგალითად, მძიმე დატვირთვამ შეიძლება გამოიწვიოს ხერხემლის დისკოების შევიწროება – „დაჯდომა“, რომელიც თანდათან იწვევს ნერვზე ზეწოლას, საბოლოოდ კი შეიძლება დადგინდეს დისკის თიაქრის დიაგნოზი. 

გარდა ამისა, სიმძიმე ძალიან ვნებს სახსრებს. შეიძლება მენჯ-ბარძაყის, მუხლის და კოჭ-წვივის სახსრების ხრტილის ნაადრევი მოცვეთა, ანუ გაფუჭება გამოიწვიოს, აქაც ვითარდება ართროზული მოვლენები, ანუ შესაძლოა ნელ-ნელა განვითარდეს სახსრების სხვადასხვანაირი დაავადება. 

 ტვირთის აზიდვისას გათვლილი უნდა იყოს მისი წონა და ზომა.

  • რა რეკომენდაციები არსებობს ტვირთის ხელით ტარებასთან დაკავშირებით?

ერთი მნიშვნელოვანი ნაწილია ის, რომ სიმძიმის აზიდვა უმჯობესია ორივე ხელით, სიმეტრიულად.

მაგალითად, მნიშვნელოვანია, რომ ბავშვს სასკოლო ჩანთის სიმძიმე ერთნაირად ჰქონდეს გადანაწილებული ორივე ბეჭზე, ცალი ხელით აქაჩვა და ასიმეტრიების გამოწვევა სიმძიმით არ არის რეკომენდებული. ასევეა დიდებში, ტვირთის წონა ჯობია ორივე ხელში იყოს გადანაწილებული და არა ცალ მხარეს, რადგან ასეთ დროს, ბუნებრივია, ცალი მხარე უფრო მეტად იტვირთება როგორც ხერხემალში, ასევე მენჯ-ბარძაყში, მუხლში და კოჭ-წვივში, სადაც იწვევს ტანდემობის დარღვევას, ანუ ამ სახსრების ცალმხრივ დატვირთვას, რომლებიც შემდგომში პათოლოგიებად ანუ დაავადებებად გარდაიქმნება.

სამედიცინო ქსელი Sutter Health – ის რეკომენდაციები ბავშვების მიერ სასკოლო ჩანთების ტარების შესახებ:

  • შეიძინეთ ზურგჩანთა ფართო, რბილი სახელურებით, რათა მინიმუმამდე დაიყვანოთ ზეწოლა მხრებზე და ლავიწის ძვალზე.
  • ატარეთ ჩანთა ორივე მხარზე, რომ წონა თანაბრად გადანაწილდეს.
  • დაჭიმეთ სახელურები ისე, რომ ჩანთა მოექცეს წელის ზემოთ დაახლოებით ორი სანტიმეტრით მაღლა.
  • მძიმე ჩანთის აზიდვისას წინ დახრის ნაცვლად, მოხარეთ ორივე მუხლი.
  • შეარჩიეთ მსუბუქი მასალისგან დამზადებული ზურგჩანთა. ტყავი უფრო მძიმეა, ვიდრე ნეილონი.
  • ჩაალაგეთ ყველაზე მძიმე ნივთები ზურგის ცენტრთან ახლოს, რათა მინიმუმამდე დაიყვანოთ დამატებითი დატვირთვა.
  • როგორ შეიძლება დავეხმაროთ სხეულს, თუ სიმძიმის აზიდვა პერიოდულად მაინც გვიწევს?

თუ პროფესიის გამო მაინც უწევს ადამიანს სიმძიმესთან შეხება და ეს მისი რუტინული საქმეა, მან პერიოდულად უნდა დაასვენოს, განტვირთოს სხეული. ანუ დღისით ამგვარ დატვირთვას საღამოს უნდა დაახმაროს განსატვირთი აქტივობები. ამისთვის საუკეთესო ვარიანტია ცოტა ხნით ორძელზე, ე.წ. ტურნიკზე ჩამოკიდება, ასევე ძალიან კარგია ცურვა და ცხადია, ცხოვრების ჯანსაღი წესი.

ასევე, ძალიან მნიშვნელოვანია იმ პროფესიის ადამიანებმა, მაგალითად, მშენებლებმა, რომელთაც სამსახურში უწევთ სიმძიმის აწევა, მაქსიმალური სიმკაცრით დაიცვან არა მარტო სიმძიმის აზიდვასთან, არამედ ნებისმიერ სხვა სამსახურებრივ საკითხთან დაკავშირებული უსაფრთხოების ზომა, რაც პროტოკოლით არის გათვალისწინებული. სამწუხაროდ, ისე ხდება, რომ ასეთ სამსახურებში ძალიან მძიმე ტრავმებს იღებენ ადამიანები, ეცემათ ტვირთი, აქვთ ღია მოტეხილობები და ზოგჯერ ძალიან მძიმე შედეგებიც დგება.

  • რამდენად შესაძლებელია ერთჯერადად აზიდული სიმძიმით განვითარდეს ხერხემლის დაზიანება?

ხერხემალზე ალბათ უფრო იშვიათია, მაგრამ შეიძლება ერთჯერადმა მძლავრმა დაქაჩვამ გამოიწვიოს ზედა ან ქვედა კიდურში კუნთის გაწყვეტა, კუნთის ნაწილობრივი მწვავე რღვევა და თუ სერიოზული დაზიანებებია, საჭირო ხდება ოპერაციული ჩარევაც კი.

გადაბეჭდვის წესი


ასევე: