ნეტგაზეთი • RU
podoliaki

დედამიწაზე ვერსად იპოვიან სიმშვიდეს – პოდოლიაკი ხერსონის თვითგამოცხადებულ მთავრობაზე

„დედამიწაზე ვერსად იპოვიან სიმშვიდეს, სანამ სასამართლო განაჩენს არ მიიღებენ“, – წერს უკრაინის პრეზიდენტის მრჩეველი მიხაილო პოდოლიაკი დროებით ოკუპირებული ხერსონის რეგიონის თვითგამოცხადებული მთავრობის წევრებზე. იგი მათ კიდევ ერთხელ მოიხსენიებს როგორც რეგიონის „გაულაიტერებს“.

„ხერსონის რეგიონი. ტიპური ტერიტორიის დაპყრობა. რუსეთის ფედერაციის მოქალაქეებისა და ფსბ-ს თანამშრომლების თვითგამოცხადებული „მთავრობა“. ბიზნესის დარბევა. მარცვლეულის ქურდობა. რეგიონის გაულაიტერებმა ყოველ დღე შიშით უნდა გაიღვიძონ – ისინი დედამიწაზე ვერსად იპოვიან სიმშვიდეს, სანამ სასამართლო განაჩენს არ მიიღებენ“, – წერს მიხაილო პოდოლიაკი.

გაულაიტერი მესამე უმაღლესი წოდება იყო ნაცისტების პოლიტიკურ ხელმძღვანელობაში და ექვემდებარებოდა მხოლოდ რაიხსლაიტერს და თავად ფიურერს.

4 ივლისს The Economist-ი წერდა, რომ უკრაინის შეიარაღებული ძალები სამხრეთით მიიწევენ, ანუ დაპყრობილ ხერსონს უახლოვდებიან. ბრიტანული პრესის ინფორმაციით, ქალაქისთვის ბრძოლა მძიმე იქნება, რადგან რუსი ოკუპანტებისგან მოსალოდნელია ძლიერი წინააღმდეგობა – შესაძლოა მათ მშვიდობიანი მოსახლეობაც გამოიყენონ, როგორც „ცოცხალი ფარი“.

ნეტგაზეთის მასალების სხვა გამოცემებში გადაბეჭდვის წესი
ავტორი
ირმა დიმიტრაძე არის გაზეთ "ბათუმელების" რეპორტიორი 2016 წლიდან