უკრაინის სამხედრო დაზვერვის ხელმძღვანელის, კირილო ბუდანოვის წინააღმდეგ საქმე რუსეთის საგამოძიებო კომიტეტმა აღძრა.
კომიტეტის ვებგვერდზე გამოქვეყნებული რელიზის თანახმად, ძიება დაიწყო სისხლის სამართლის კოდექსის 205-ე მუხლით, რომელიც ტერორისტული აქტების მოწყობის მუქარას გულისხმობს.
„გამოძიებამ დაადგინა, რომ კირილო ბუდანოვი ბრიტანულ გამოცემა Financial Times-თან ინტერვიუში, რომელიც 2022 წლის ივნისში გამოქვეყნდა, ღიად იმუქრებოდა რუსეთში და რუსეთის კოტროლირებად ტერიტორიებზე ტერაქტების მოწყობით. გამოძიება მუშაობს, რათა დაადგინოს დანაშაულის გარემოებები და ბურდანოვს სისხლის სამართლის პასუხისმგებლობა დააკისროს,“ – ნათქვამია რუსეთის საგამოძიებო კომიტეტის მიერ გამოქვეყნებულ რელიზში.
გენერალი კირილო ბუდანოვი უკრაინის თავდაცვის უწყების სადაზვერვო სამსახურის უფროსად 2020 წელს დანიშნეს. ომამდე ის მედიასთან იშვიათად ჩნდებოდა, თუმცა დღეს უკრაინაში ერთ-ერთი ყველაზე გავლენიანი და ავტორიტეტული ძალოვანია.
სწორედ კირილო ბუდანოვი ხელმძღვანელობს სამხედრო ტყვეების, მათ შორის, „აზოვსტალის“ დამცველთა გაცვლის პროცესს.
დაზვერვის გენერალმა რამდენიმე დღის წინ ისაუბრა ომის დასრულების შესაძლო ვადებზე და განაცხადა, რომ გარდამტეხი შემობრუნების მომენტს აგვისტოს დასაწყისში ელის, ხოლო ომი უახლოეს მომავალში უკრაინის გამარჯვებით დასრულდება.
ბუდანოვის თქმით, 2022 წლის აგვისტოს დასაწყისში განვითარდება მოვლენები, რაც მთელი მსოფლიოსთვის ხილულს გახდის გარდამტეხი მომენტის დაწყებას.
ჯერ კიდევ მაისში, „უკრაინსკა პრავდასთვის“ მიცემულ ინტერვიუში, ბუდანოვი ომში ასეთი მომენტის დადგომის შესაძლებლობას იმით ხსნიდა, რომ აგვისტოდან უკვე ბრძოლის ველზე იქნება ის შეიარაღება, რომელსაც უკრაინას დასავლელი პარტნიორები აწვდიან.
