უკრაინის გენერალურმა პროკურატურამ სასამართლოში ომის დროს ჩადენილი გაუპატიურების პირველი საქმე გაგზავნა.
ბრალდებული მიხაილ რომანოვია, რომელსაც ბრალად ედება კიევის ოლქში ადგილობრივი მცხოვრების მკვლელობა და მისი ცოლის გაუპატიურება. ის პირველი რუსი სამხედროა, რომელსაც სექსუალური ძალადობის ბრალდებით გაასამართლებენ.
საქმის შესახებ საკუთარ ფეისბუქ გვერდზე უკრაინის გენერალურმა პროკურორმა, ირინა ვენედიქტოვამ დაწერა.
გამოძიების მტკიცებით, ომის დანაშაულები 239-ე პოლკის 90-ე გვარდიის სატანკო დივიზიის სამხედრო მოსამსახურემ, მიხიალ რომანოვმა, 2022 წლის მარტში, ოკუპირებულ ბროვარსკის რაიონში ჩაიდინა. ბრალდების თანახმად, ის ერთ-ერთ სოფელში, კერძო სახლში შევარდა და სახლის მეპატრონე მოკლა. კაცის მკვლელობის შემდეგ კი, მთვრალმა რომანოვმა და სხვა სამხედროებმა რამდენჯერმე გააუპატიურეს მისი ცოლი. ქალს თან იარაღით ემუქრებოდნენ და აშინებდნენ, რომ იძალადებდნენ მის არასრულწლოვან შვილზეც, რომელიც იმ დროს იქვე იმყოფებოდა.
გენერალური პროკურორი აღნიშნავს, რომ მიხაილ რომანოვი ამჟამად უკრაინის კონტროლირებად ტერიტორიაზე არ იმყოფება, თუმცა მას აუცილებლად დააკავებენ და პასუხს აგებს ჩადენილი დანაშაულისთვის.
ირინა ვენედიქტოვამ მიმართა ყველას, ვისაც შეიძლება დამატებითი ინფორმაცია ჰქონდეს მიხაილ რომანოვის მიერ ჩადენილი სხვა სამხედრო დანაშაულების შესახებ, აცნობონ სამართალდამცველებს.
გენერალურმა პროკურორმა ასევე მოუწოდა ომის დროს ძალადობაგამოვლილ ადამიანებს, რომ როდესაც კი ამისთვის მზად იქნებიან, მიმართონ პროკურატურას.
უკრაინის ომბუდსმენმა ლიუდმილა დენისოვამ არაერთხელ ისაუბრა გაუპატიურების ფაქტებზე ომის პერიოდში, მათ შორის არასრულწლოვანებზე. მისი თქმით, ჯერჯერობით შეუძლებელია დასახლებული პუნქტების ოკუპაციის დროს რუსი სამხედროების მიერ ჩადენილი სექსუალური დანაშაულების მასშტაბის შეფასება.
მთავარი ფოტო: ფოტოკოლაჟი – მიხაილ რომანოვი, ირინა ვენედიქტოვა/ფოტოები ირინა ვენედიქტოვას ფეისბუქ გვერდიდან
