აჭარის საავტომობილო გზების დეპარტამენტს მამუკა თურმანიძე უხელმძღვანელებს. ის 2020 წლიდან ამავე უწყებაში უფროსის მოადგილედ მუშაობდა, მანამდე კი, 2015 წლიდან 5 წლის განმავლობაში მამუკა თურმანიძე სუსის ანტიკორუფციული სააგენტოს აჭარის რეგიონალური მთავარი სამმართველოს მე-2 სამსახურის უფროსი ოპერატიული თანამშრომელი იყო.
მამუკა თურმანიძეს 2020 წლამდე მხოლოდ სამართალდამცავ ორგანოში მუშაობის გამოცდილება ჰქონდა. სუსში დასაქმებამდე იგი შინაგან საქმეთა სამინისტროს ანტიკორუფციულ სააგენტოში მუშაობდა სხვადასხვა პოზიციაზე, მათ შორის, 2013 წელს იყო აჭარის რეგიონალური მთავარი სამმართველოს მე-2 სამსახურის უფროსის მოადგილე. 2007 წლიდან 2012 წლამდე კი უბნის ინსპექტორ- გამომძიებლად მუშაობდა.
აჭარის საავტომობილო გზების დეპარტამენტს ამ დრომდე ზაზა შავაძე ხელმძღვანელობდა, რომელიც გუშინ, 24 მაისს, აჭარის სოფლის მეურნეობის მინისტრად დანიშნეს.
გიორგი სურმანიძე, რომელიც ამ დრომდე აჭარის სოფლის მეურნეობის მინისტრი იყო, თორნიკე რიჟვაძემ აჭარის ფინანსთა და ეკონომიკის მინისტრის მოადგილის თანამდებობაზე წარადგინა.
ახალი მოადგილე ჰყავს აჭარის ჯანდაცვის მინისტრსაც. ამ თანამდებობაზე თორნიკე რიჟვაძემ ჯანდაცვის სამინისტროს თანამშრომლებს ედუარდ ნაკაშიძე წარუდგინა, რომელსაც აჭარის მთავრობის აპარატის მიერ გავრცელებული ინფორმაციით, საჯარო უწყებებში და, მათ შორის, ხელმძღვანელ თანამდებობებზე მუშაობის მრავალწლიანი გამოცდილება აქვს.
