ცხადდება კონკურსი მოსწავლეებისთვის საზაფხულო მედიასკოლაში მისაღებად

გაზეთი „ბათუმელები“ „ბათუმის ამერიკულ კუთხესთან“ ერთად აცხადებს კონკურსს სკოლის მოსწავლეებისათვის საზაფხულო მედიასკოლაში მონაწილეობის მისაღებად.

საზაფხულო მედიასკოლის  მონაწილეები გაივლიან კურსს ჟურნალისტიკასა და მედიაწიგნიერებაში.

მედიასკოლის საზაფხულო სკოლის მონაწილეები შეისწავლიან ახალი ამბებისა და ვიდეო/ფოტომასალის მომზადებას, ინტერვიუს ჩაწერას, ციფრული მედიის სპეციფიკას, მედიაწიგნიერების ისეთ საკითხებს, როგორიცაა ყალბი ინფორმაციის იდენტიფიცირება და ა.შ.

პროგრამის მიმდინარეობისას მონაწილეები თავად მოამზადებენ ჟურნალისტურ მასალებს ტრენერების დახმარებით. მათ მიერ მომზადებული ნამუშევრები გამოქვეყნდება „ბათუმელების“ ვებგვერდზე: batumelebi.ge.

სასწავლო კურსის დასრულების შემდეგ მსმენელები მიიღებენ სერტიფიკატს.

სწავლა უფასოა.

კონკურსის პირობები:

• კონკურსში მონაწილეობა შეუძლიათ X, XI და XII კლასის მოსწავლეებს აჭარიდან
• კონკურსის მონაწილე უნდა ფლობდეს კომპიუტერთან მუშაობის ელემენტარულ უნარ–ჩვევებს (ბეჭდვა, ელფოსტა, სოციალური ქსელები)

კონკურსში მონაწილეობისთვის გამოგზავნეთ CV და მოკლე სამოტივაციო წერილი (მაქსიმუმ 250 სიტყვა და მოგვიყევით, რატომ გინდათ მონაწილეობა საზაფხულო მედიასკოლაში) ელექტრონულ ფოსტაზე: schoolbatumelebi@gmail.com 

სათაურში (subject) ქართული შრიფტით მიუთითეთ: საზაფხულო მედიასკოლა და თქვენი სახელი და გვარი [მაგალითად: საზაფხულო მედიასკოლა – ანა დუმბაძე]. არასრული განაცხადი არ განიხილება. 

კონკურსში განცხადებების მიღების ბოლო ვადაა 7 ივნისი.

კონკურსის პირველ ეტაპზე შერჩეულ კანდიდატებს დავუკავშირდებით და შედგება გასაუბრება, რის საფუძველზეც შეირჩევა საზაფხულო მედიასკოლის 10-12 მონაწილე.

შერჩევის დროს უპირატესობა მიენიჭება იმ კონკურსანტს, რომელსაც გააზრებული აქვს დემოკრატიული ღირებულებების მნიშვნელობა და მისი გავლენა საზოგადოებაზე. 

შეხვედრები მედიასკოლაში შედგება კვირაში ორჯერ, შაბათ–კვირას. ტრენერები იქნებიან გაზეთ „ბათუმელების“ ჟურნალისტები.

შეხვედრები ჩატარდება „ბათუმელების“ რედაქციაში, ბათუმში, მემედ აბაშიძის ქუჩის №48-ში.