იმის გამო, რომ სამხრე კამერის ჩანაწერები მოსამართლესთან პოლიციელებმა ვერ მიიტანეს, სხდომა გადაიდო.
საუბარია 6 მაისს ღამით აქციაზე დაკავებულ 24 ადამიანზე, მათგან სამის – ბაჩი მექვაბიშვილის, ლევან გორგილაძისა და გიგა თედორაძის სასამართლო განხილვა უნდა შემდგარიყო დღეს, 18 მაისს.
იმის მიუხედავად, რომ კარვების დაშლიდან და აქციის მონაწილეების დაკავებიდან 12 დღე გავიდა, შსს-ს წარმომადგენელმა, თეა ლაღაძემ, მოსამართლე ალექსანდრე გოგუაძეს უთხრა, რომ ამ დროში 112-დან ჩანაწერი ვერ მიაწოდეს.
„ის ჯერ სერვერზე უნდა აიტვირთოს“, – განმარტა პოლიციელმა.
მოსამართლემ ისე გადადო სხდომა, რომ არ გასჩენია კითხვა: რასთან გვაქვს საქმე, როცა შსს-ს ერთი უწყება – 112, მეორე უწყებას – პოლიციას სასამართლოსთვის გადასაცემ მტკიცებულებას 12 დღეშიც კი ვერ აწვდის.
„მე პირადად დამაკავეს კრიმინალური პოლიციის წარმომადგენლებმა, მათ არ აქვთ სამხრე კამერები… გვაქვს წარმოდგენილი ვიდეოები, სადაც უწყვეტად ჩანს ჩვენი დაკავება“, – მიმართა მოსამართლეს ბაჩი მექვაბიშვილმა, ის ბათუმის საკრებულოს წევრია.
6 მაისს აქციაზე პოლიციელებმა ბათუმის, ქობულეთისა და ხელვაჩაურის საკრებულოს 7 წევრი დააკავეს, ასევე, აჭარის უმაღლესი საბჭოს 3 დეპუტატი.
„როდის მოგაწვდიან? ისე არ გამოვიდეს, რომ შემდეგ სხდომაზეც არ გქონდეთ ჩანაწერი…“ – უთხრა პოლიციელებს მოსამართლე ალექსანდრე გოგუაძემ.
„როგორც მითხრეს, დღეს ან ხვალ უნდა მივიღოთ“, – უპასუხა მოსამართლეს შსს-ს წარმომადგენელმა, თეა ლაღიძემ.
შემდეგი სასამართლო სხდომა 20 მაისს გაიმართება. ბათუმში ადმინისტრაციული წესით დაკავებულ 24 ადამიანს, ვისაც პოლიციამ კარვები დაუშალა, წვრილმან ხულიგნობას და პოლიციელის კანონიერი მოთხოვნების დაუმორჩილებლობას ედავებიან.
___
ამავე თემაზე:
„დავაი“ ანუ ვისი ბრძანებით დააკავეს 23 ოპოზიციონერი – სისტემა თავისუფლების წინააღმდეგ