ნეტგაზეთი • RU

რუსები თავისიანებს ტოვებენ, ივიწყებენ, წვავენ, შლიან ისტორიიდან – პოდოლიაკი

უკრაინის პრეზიდენტის მრჩეველი მიხაილო პოდოლიაკი უკრაინაში განადგურებულ კრეისერ „მასკვაზე“ მყოფი ახალწვეულის მამის პოსტს ეხმაურება. კაცი გემის ჩაძირვიდან ანუ 13 აპრილიდან დღემდე ცდილობს გაარკვიოს თავისი შვილის ბედი. პოდოლიაკის თქმით, რუსები თავისიანებს „ტოვებენ, ივიწყებენ, კარგავენ, წვავენ, შლიან ისტორიიდან“.

„ერთ-ერთი მთავარი რუსული პროპაგანდისტული მითი – „რუსები არ ტოვებენ თავისიანებს“. მშვენივრადაც ტოვებენ! ტოვებენ, ივიწყებენ, კარგავენ, წვავენ, შლიან ისტორიიდან. მაგალითად, წვევამდელის (!) მამამ, რომლის შვილიც კრეისერ „მასკვაზე“ მსახურობდა, დღემდე ვერ მოახერხა საკუთარი შვილის ბედის გარკვევა. ერთ-ერთი ათასობით მიტოვებულს შორის.

ის არ იბრძოდა, არ მომკვდარა, უბრალოდ, გაქრა – უკრაინაში თვითმკვლელი ჯარისკაცების ახალ პარტიის გაგზავნის სამზადისში მხრებს იჩეჩავენ რუსი გენერლები. არანაირი ღირსება, დიდება, ანაზღაურება, მედლები. ვინც მოკვდა – დაიკარგა, ვინც გადარჩა – დარჩა მარადიული სირცხვილის დამღით. სამშობლო [რუსეთის ფედერაცია] ყოველთვის მიგატოვებს.

ხომალდ „მასკვაზე“ მყოფი მეზღვაურის მამას გუშინ, 5 მაისს, ოფიციალურად აცნობეს, თუ რა მოუვიდა მის შვილს. მამისთვის გაგზავნილ წერილში ერთ-ერთი სამხედრო ნაწილის ხელმძღვანელი წერს: „მოკვლევამ დაადასტურა, რომ გემი, რომელზეც მსახურობდა შკრებეცი ე.დ. არ იმყოფებოდა უკრაინის ტერიტორიულ წყლებში. ასევე არ იყო სამხედრო ნაწილის სიაში, რომელიც მონაწილეობს სპეციალურ სამხედრო ოპერაციაში. 13.04.2022 -ის საგანგებო შემთხვევის დროს, რამაც გამოიწვია გემის დაღუპვა, უკანასკნელი უგზო-უკვლოდ დაიკარგა… დღეისათვის თქვენი შვილის ადგილსამყოფელი არ არის დადგენილი“.

სწორედ ამ ოფიციალურ წერილს გამოეხმაურა მიხაილო პოდოლიაკი.

ნეტგაზეთის მასალების სხვა გამოცემებში გადაბეჭდვის წესი
ავტორი
ირმა დიმიტრაძე არის გაზეთ "ბათუმელების" რეპორტიორი 2016 წლიდან