ბათუმის საკრებულო 21 აგვისტოს სხდომაზე განიხილავს განკარგულებების პროექტს, რომლითაც ქალაქის მერიას საქართველოს საპატრიარქოსთვის მუნიციპალური ქონების გადაცემაზე თანხმობა უნდა მისცეს.
საპატრიარქოს ქალაქის კუთვნილი გარკვეული ქონება მუდმივ სარგებლობაში უსასყიდლოდ გადაეცემა.
ეს ქონება კი, განმარტებითი ბარათის მიხედვით სხვადასხვა ეკლესია-მონასტრებს მოხმარდება. კერძოდ:
- 1000 კვადრატული მეტრი მეორადი ქვაფენილი – ყოველთა ქართველთა წმინდათა სახელობის დედათა მონასტრისათვის;
- 2000 კვადრატული მეტრი მეორადი ქვაფენილი – აღდგომის მამათა მონასტრისათვის;
- 800 კვადრატული მეტრი მეორადი ქვაფენილი – შემოქმედის ეპარქიის ლანჩხუთის მუნიციპალიტეტის, სოფელ ნინოშვილში წმინდა დავით აღმაშენებლის სახელობის ტაძრისა და მონასტრისათვის.
ბათუმის მერია განმარტებით ბარათში წერს, რომ ეკლესია/მონასტრების ეზოების კეთილმოწყობის მიზნით, მუნიციპალიტეტის საკუთრებაში არსებული მეორადი ქვაფენილების გადაცემაზე ბათუმისა და ლაზეთის მიტროპოლიტის მდივნის და შემოქმედის ეპარქიის მიტროპოლიტის წერილები ქალაქის მერიაში 2026 წლის აპრილში შევიდა.
ამავე წლის ივნისში ქალაქის მერიაში ბათუმისა და ლაზეთის მიტროპოლიტის მდივნის კიდევ ერთი წერილი შესულა – ეკლესია/მონასტრების ეზოების შემოღობვის მიზნით, მუნიციპალიტეტის საკუთრებაში არსებული მეორადი, გზის გამყოფი კონსტრუქციის [მოაჯირის] უსასყიდლოდ გადაცემაზე.
ბათუმის მერია თანახმაა საპატრიარქოს გადასცეს შემდეგი ქონება:
- 160 გრძივი მეტრი მეორადი მოაჯირი – ქობულეთის წმინდა მღვდელმოწამე კირიონ კათოლიკოსის სახელობის და წმინდა ნიკოლოზის სახელობის ტაძრისათვის;
- 160 გრძივი მეტრი მეორადი მოაჯირი – სოფელ ბობოყვათის ახალმოწამეების მშენებარე და წმინდა იოანე ნათლისმცემლის სახელობის ტაძრისათვის;
- 80 გრძივი მეტრი მეორადი მოაჯირი – სოფელ კვირიკეს ყოვლადწმინდა ღვთისმშობლის „ღირს არსის“ ხატის სახელობის მშენებარე ტაძრისათვის.
განმარტებით ბარათში ასევე აღნიშნულია, რომ „მოქმედი კანონმდებლობით ქალაქ ბათუმის მუნიციპალიტეტი უფლებამოსილი არაა მუნიციპალიტეტის ქონება სარგებლობაში გადასცეს უშუალოდ ეკლესია/მონასტრებსა და გიმნაზიას.
ამასთან, ბათუმის მერია უფლებამოსილია მუნიციპალიტეტის საკუთრებაში არსებული ქონება, შესაბამისი მომართვის შემთხვევაში მუდმივ სარგებლობაში გადასცეს სსიპ „საქართველოს საპატრიარქო“-ს.“
დოკუმენტებში არც ის არის შეფასებული თუ რა ღირებულებისაა ქონება, რომელიც მერიამ საპატრიარქოს უნდა გადასცეს.
დაახლოებით ხუთი წლის წინ საპატრიარქო ბათუმის მერიისგან მიწის ნაკვეთის საკუთრებაში გადაცემასაც ითხოვდა, მაგრამ უარი მიიღო. თუმცა, მერია თანახმა იყო უძრავი ქონება საპატრიარქოსთვის უზუფრუქტით, აღნაგობის უფლებით გადაეცა. საუბარია ბესიკის ქუჩაზე მდებარე მიწის ნაკვეთზე სადაც მოქმედი ეკლესია დგას.
აღნიშნული მიწის ნაკვეთი საჯარო რეესტრის ბოლო ამონაწერით ისევ მერიის საკუთრებაშია და საპატრიარქოს მიერ მისი რაიმე ფორმით სარგებლობა რეესტრში დოკუმენტურად ასახული არ არის.
მთავარი ფოტო: მეორადი ქვაფენილი ბათუმის მერიის საწყობში / ფოტო „ბათუმელების“ არქივიდან
ამ თემაზე:
ბათუმის მერია არ არის თანახმა, ეკლესიას მიწა საკუთრებაში გადაეცეს
