48 წლის ინდირა კირჩხელი ქობულეთში ცხოვრობს და სოფელ ქობულეთში სომხური ჯიშის 2 000-მდე ვარდს უვლის.
ის გვიყვება, რომ ვარდების მოშენებაზე 2 წელი ფიქრობდა. ხედავდა სოციალურ ქსელებში ვარდების სათბურებს და თავადაც უნდოდა ამ საქმის წამოწყება, მაგრამ ოჯახს სათბურის გასაკეთბლად საკმარისი ფული არ ჰქონდა. ამიტომ ყოვნდებოდნენ.
ბოლოს, ინდირას სათბურის მოწყობაში ახლობელი დაეხმარა და უკვე 2 წელია, რაც ვარდების სათბური აქვთ.
„სომხეთიდან ვიყიდეთ პირველად ვარდის 2 000 ნერგი და მათგან მხოლოდ 200 ძირი გადარჩა.
არ ვიცოდით, როგორ უნდა შეგვეფასებინა ვარდის ნერგის ხარისხი. ადამიანმა, ვინც ვარდის ნერგები მოგვყიდა პირველად, ძველი ნერგები ჩამოგვიტანა“, – ამბობს ინდირა.
ინდირას თქმით, ვარდის ნერგების გამყიდველმა ოჯახს ზარალი აუნაზღაურა მას შემდეგ, რაც უსაყვედურეს და ხელახლა ჩამოუტანა მათ კარგი ხარისხის ვარდის 2 000 ნერგი.
თავდაპირველად ინდირამ არ იცოდა, როგორ უნდა მოევლო ვარდისთვის. ის ვარდის ნერგების ზრდასთან ერთად სწავლობდა ყველაფერს ნელ-ნელა. აკვირდებოდა, სხვები როგორ უვლიდნენ და არც შეკითხვების დასმას ერიდებოდა.
„მთელი დღე სათბურში ვარ. თითქმის აქ ვცხოვრობ. დილით მივდივარ სათბურში და გვიან საღამოს ვბრუნდები სახლში. ვარდს თავისებური მოვლა სჭირდება.
ბაზარზე ვარდის რეალიზება საკმაოდ რთულია. სადაც მიდიხარ, ყველას სულ ტყუილად უნდა – ლარში, ლარ-ნახევარში. ამდენს რომ იშრომებ, იწვალებ, ცოტა ხომ უნდა მოიგო, არა?“ – ამბობს ინდირა.
ინდირა კირჩხელი ვარდების სათბურში
როგორც ინდირა გვიხსნის, ვარდის ფასი მის სიმაღლეზეა დამოკიდებული. ერთი ცალი ვარდი შესაძლოა 2-3 ლარიც ღირდეს. ის ვარდებს ძირითადად ქობულეთში, ჩაქვში და ადლიაში, ყვავილების მაღაზიებში ყიდის. „ხანდახან თეთრებში უნდათ ვარდის ყიდვა. დაბალ ფასში ვარდების გაყიდვა ძალიან მებრალება, დიდი შრომა დევს“, – ამბობს ქალი.
ინდირას სამომავლო გეგმებში კიდევ ერთი სათბურის აშენება შედის – დამატებითი 2 000 ძირი ვარდის მოშენება უნდა: „ამის გაკეთებას ალბათ 2 წელიწადში თუ შევძლებთ, ფინანსური მდგომარეობის გამო“.
როგორც ინდირასგან ვიგებთ, ვარდის ფასი ყველაზე მაღალი მარტსა და სექტემბერშია.
„ოთხი დღის წინ ვიყავი ბაზარში. ასე მითხრეს, ახლა შედარებით ძვირია ვარდი, მაგრამ შემდეგ ნაკლებს გადავიხდით, რადგან ყველა მხრიდან შემოვა ბაზარზე ვარდი და ფასიც დაიკლებსო“, – ამბობს ინდირა.
ინდირას თქმით, ვარდის მოვლას საკმაოდ დიდი შრომა სჭირდება – ნერგებს სულ თავს უნდა დასტრიალებდე. ვარდს ყოველკვირეული შეწამვლა, 10-15 დღეში ძირების გამარგვლა და პერიოდულად სასუქის მიცემა სჭირდება.
ინდირა ახლა დაახლოებით 1900 ძირ ვარდს უვლის. მისი თქმით, 100-მდე ნერგი გაუხმა. გახარებულია, რომ ცივ ზამთარს მისი ვარდების დიდი ნაწილი გადაურჩა და არც სათბური დაზიანებულა. ვარდებს ძირითადად ინდირა უვლის და ხანდახან მეუღლე ეხმარება, როცა მას თავისუფალი დრო აქვს.
ინდირა გვიყვება, რომ ვარდი ახლა იწყებს კოკრების გაკეთებას. ინდირა ვარაუდობს, რომ მალე ყოველ მეორე დღეს 100-150 ძირი ვარდის აღებას შეძლებს იმის მიხედვით, თუ რამდენად კარგად გაიშლება კოკრები.
ის ვარდებს ყოველ საღამოს რწყავს და ამბობს, რომ „ვარდთან ურთიერთობა სასიამოვნო რომ არ იყოს, არ გააშენებდა: „მიყვარს ვარდები, მსიამოვნებს მათთან ურთიერთობა. ამიტომაც არ ვერიდები შრომას და ყველაფერს ვაკეთებ, რაც ვარდებს სჭირდებათ“.
ინდირა კირჩხელის ვარდების სათბური
