24 თებერვლის, უკრაინაზე რუსეთის თავდასხმის შემდეგ, დასავლეთის 28 ქვეყნიდან დაახლოებით 400 რუსი დიპლომატი გააძევეს. ამის შესახებ ორშაბათს, 25 აპრილს, რუსეთის ფედერაციის საგარეო საქმეთა მინისტრის მოადგილემ, ევგენი ივანოვმა განაცხადა.
„უკრაინაში სპეციალური სამხედრო ოპერაციის დაწყების შემდეგ ჩვენი საგარეო მისიების 400-მდე თანამშრომელი გააძევეს დასავლეთის 28 ქვეყნიდან. ლიდერები არიან პოლონეთი, გერმანია, სლოვენია, სლოვაკეთი, ხორვატია, საფრანგეთი, იტალია, ესპანეთი”, – თქვა მან.
მისივე თმით, დასავლეთის ბევრ ქვეყანაში შემცირდა რუსეთის საკონსულოების თანამშრომელთა რაოდენობაც. მისი აზრით, „ეს კეთდება იმისათვის, რომ გართულდეს ნებისმიერი დახმარების გაწევა, რუსეთის მოქალაქეებისთვის და ამ ქვეყნებში მცხოვრები რუსებისთვის“.
რუსეთ-უკრაინის ომი 2022 წლის 24 თებერვალს, კიევის დროით დილის 5 საათზე დაიწყო. რუსეთის შეიარაღებული ძალები სახმელეთო, საზღვაო და საჰაერო გზით დაესხნენ თავს უკრაინას. რუსეთი თავდასხმას უკრაინაზე ომის ნაცვლად „სპეციალურ სამხედრო ოპერაციას“ უწოდებს.
______________
ფოტო: ევროპის პრესფოტო სააგენტო. EPA/YURI KOCHETKOV
