Fox news-ის ჟურნალისტი ბენჯამინ ჰოლი, რომელიც სამი კვირის წინ უკრაინაში დაიჭრა, დღეს პირველად გამოჩნდა საჯაროდ. მან ტვიტერზე საავადმყოფოში გადაღებული ფოტო გამოაქვეყნა და თავისი ჯანმრთელობის მდგომარეობის შესახებ დაწერა.
ბენჯამინ ჰოლი 14 მარტს, კიევთან ახლოს, მაშინ დაიჭრა, როდესაც რუსმა სამხედროებმა ჟურნალისტების მანქანას საარტილერიო ცეცხლი გაუხსნეს. თავდასხმისას დაიღუპნენ არხის უკრაინელი კონსულტანტი ოლექსანდრა (საშა) კუვშინოვა და ოპერატორი პიერ ზაკრზევსკი.
„სამი კვირა გავიდა უკრაინაში მომხდარი თავდასხმიდან და დავიწყებ უკვე ამ ამბების გაზიარებას, მაგრამ უპირველესად, მინდა, გავიხსენო ჩემი კოლეგები, პიერი და საშა, ვინც ვერ გადარჩა იმ დღეს. მე და პიერმა მთელი მსოფლიო ერთად მოვიარეთ. ეს საქმე მას ბედნიერებას ანიჭებდა და მისი განწყობა გადამდები იყო“, – ამბობს ბენჯამინ ჰოლი.
თავდასხმის შედეგად მძიმედ დაჭრილი ბენჯამინ ჰოლი თავიდან ჯერ კიევის კლინიკაში მოათავსეს. შემდეგ გერმანიაში, შემდეგ კი შეერთებულ შტატებში, ტეხასის სამხედრო ჰოსპიტალში გადაიყვანეს.
„რომ შევაჯამო, დავკარგე ერთი ფეხის ნახევარი და მეორე ფეხის ტერფი. ერთ ხელს ახლაც აწყობენ, ცალი თვალიდან ვეღარ ვხედავ და სმენაც დამიზიანდა. და მაინც, ძალიან იღბლიანი ვყოფილვარ“, – დაწერა ჟურნალისტმა.
ამერიკული ტელეარხის, Fox New-ის გუნდზე თავდასხმამდე ერთი დღით ადრე, 13 მარტს, უკრაინაში მოკლეს ამერიკელი ჟურნალისტი ბრენტ რენო. ჟურნალისტთა დაცვის კომიტეტისა და ორგანიზაციის „რეპორტიორები საზღვრებს გარეშე“ მონაცემებით, რუსეთის სამხედრო აგრესიის დაწყებიდან დღემდე, მოვალეობის შესრულებისას დაიღუპა 7 და დაიჭრა 11 ჟურნალისტი.
