საქართველოს შინაგან საქმეთა სამინისტროს მონაცემებით, 2022 წლის 24 თებერვლიდან 20 მარტის ჩათვლით საქართველოში რუსეთის 35 028 მოქალაქე შემოვიდა.
რუსეთის ფედერაციის მოქალაქეთა მიერ საქართველოს სახელმწიფო საზღვრის კვეთის სტატისტიკა „ბათუმელებმა“ შსს-დან 7 მარტს წერილობით გამოითხოვა. პასუხი კი დღეს, 29 მარტს, მივიღეთ.
სამინისტროდან ასევე ვითხოვდით, რომ ვიზიტორთა მიერ საზღვრის კვეთის მონაცემები მოეწოდებინათ დღეების მიხედვით – „კონკრეტულად რომელ დღეს რუსეთის ფედერაციის რამდენმა მოქალაქემ გადმოკვეთა საქართველოს სახელმწიფო საზღვარი; ამასთან, რა გზით [სახმელეთო, საჰაერო, საზღვაო]“, – თუმცა, ეს ინფორმაცია სამინისტრომ არ მოგვაწოდა.
რუსეთის ფედერაციის მოქალაქეთა მიერ საქართველოს სახელმწიფო საზღვრის გადაკვეთა (შემოსვლა) / წყარო: შსს
„გაცნობებთ, რომ სამინისტროს საინფორმაციო-ანალიტიკურ დეპარტამენტის საინფორმაციო ცენტრში სტატისტიკური მონაცემების დამუშავება ხორციელდება ყოველი საანგარიშო თვის დასრულების შემდეგ. შესაბამისად, არსებული მაღალი საზოგადოებრივი ინტერესებიდან გამომდინარე, რუსეთის ფედერაციის მოქალაქეთა საქართველოს სახელმწიფო საზღვრის გადაკვეთის (შემოსვლა) შესახებ ინფორმაციის დამუშავება განხორციელდა ერთჯერადად.
შენიშვნა: საშუალო სტატისტიკური ცდომილების ზღვარი +/- 2,4%.“ – აღნიშნულია სამინისტროდან „ბათუმელებისთვის“ გამოგზავნილ წერილში.
საქართველოში შემოსული რუსეთის მოქალაქეების რაოდენობაზე შს მინისტრმა ვახტანგ გომელაურმა პარლამენტში 17 მარტს ისაუბრა. მაშინ მინისტრმა განაცხადა, რომ 2022 წლის 24 თებერვლიდან 17 მარტამდე პერიოდში საქართველოში შემოვიდა რუსეთის 30 439 მოქალაქე, ხოლო გავიდა – 17 801. ანუ რუსეთის 12 638 მოქალაქე საქართველოში დარჩა:
რუსეთ-უკრაინის ომის დაწყების შემდეგ ასობით რუსეთის მოქალაქემ საქართველოს საჯარო რეესტრსაც მიმართა. ისინი საქართველოში ახალ შპს-ებს არეგისტრირებენ, ან რეგისტრირდებიან როგორც ინდმეწარმეები.
„ბათუმელებმა“, ასევე, 7 მარტს, შემოსავლების სამსახურიდან ოფიციალურად გამოითხოვა რუსეთ-უკრაინის ომის დაწყებიდან შემდგომ პერიოდში რამდენი კომპანია დაარეგისტრირეს რუსეთის მოქალაქეებმა საქართველოში. პასუხი ამ დრომდე არ მიგვიღია.
ამ თემაზე:
რუსული კომპანიების ფილიალები, რომლებიც ტენდერებში იმარჯვებენ
