ნეტგაზეთი • RU

ოპოზიცია ბათუმში რიჟვაძის გადადგომას ითხოვს – იმპიჩმენტი არ იქნება

ოპოზიცია ბათუმში აჭარის მთავრობის თავმჯდომარის, თორნიკე რიჟვაძის თანამდებობიდან გადადგომას ითხოვს.

„კითხვაზე – ვინ დაიწყო ომი უკრაინაში? აჭარის მთავრობის თავმჯდომარესა და პოლიტსაბჭოს წევრს პასუხი არ ჰქონდა. უფრო მეტიც, უკრაინაში მიმდინარე ომის შეფასებისას არც ერთხელ არ უხსენებია რუსეთი, როგორც აგრესორი და ოკუპანტი ქვეყანა,”- აღნიშნულია ოპოზიციური ერთობის მიერ გავრცელებულ განცხადებაში.

აჭარის უმაღლესი საბჭოს წევრებმა დღეს, 10 მარტს, ხელი მოაწერეს თორნიკე რიჟვაძის იმპიჩმენტის დაწყების მოთხოვნაზე განცხადებას, თუმცა ოპოზიციის აჭარის უმაღლეს საბჭოში სულ 6 წევრი ჰყავს, იმპიჩმენტის პროცედურის დაწყებას კი 7 ხელმოწერა სჭირდება.

„არ გამოვრიცხავთ, რომ მეშვიდე ხელმომწერი ირაკლი ჩავლეიშვილი იყოს,“ – ამბობს მირდატ ქამადაძე, ენმ-ის წევრი აჭარაში.

თუმცა ირაკლი ჩავლეიშვილმა, რომელიც აჭარის უმაღლესი საბჭოს დამოუკიდებელი დეპუტატია, „ბათუმელებთან“ განაცხადა, რომ მხარს არ უჭერს თორნიკე რიჟვაძის იმპიჩმენტს.

„ამ წუთას არ არის ამის დრო, სალომე ზურაბიშვილიც იყო მტერი, მაგრამ ახლა მოკეთე გახდა… დღეს სამყარო დგას მსოფლიო კატასტროფის წინაშე, არა მგონია, ეს ის დრო იყოს, ჩვენ ერთმანეთში ვეძებოთ მტრები. პარტიული ინტერესები არ უნდა დავაყენოთ წინ, არ უნდა გავთითოკაცდეთ,“ – გვითხრა ირაკლი ჩავლეიშვლმა.

უმაღლესი საბჭოს გარდა ოპოზიცია მანიფესტით იწყებს საზოგადოებაში ხელმოწერების შეგროვებას.

„იმპიჩმენტის არანაირი საფუძველი არ არსებობს,”- უპასუხა დღესვე ოპოზიციას ბრიფინგით ტიტე აროშიძემ, უმაღლესი საბჭოს თავმჯდომარის მოადგილემ.

„ჩვენ ყველგან ვამბობთ, რომ რუსეთი შეიჭრა უკრაინაში,”- უთხრა ჟურნალისტებს ტიტე აროშიძემ, როცა მას ვკითხეთ, რამდენად მოეწონა თავად მას თორნიკე რიჟვაძის პასუხი.

ოპოზიციის ბრიფინგი აჭარის უმაღლეს საბჭოში, 10 მარტი, 2022 

ნეტგაზეთის მასალების სხვა გამოცემებში გადაბეჭდვის წესი
ავტორი