ნეტგაზეთი • RU

როდის განახლდება სამგზავრო მატარებლების მოძრაობა თბილისის მიმართულებით

რიკოთის უღელტეხილის მონაკვეთზე, სოფელ მარელისთან მეწყერი 7 მარტს ჩამოწვა, რის გამოც სამგზავრო მატარებლების მოძრაობა ამ დრომდე შეჩერებულია.

დღეს, 10 მარტს, „ბათუმელებმა“ საქართველოს საავტომობილო გზების დეპარტამენტსა და „საქართველოს რკინიგზას“ ჰკითხა, რა სამუშაოები შესრულდა პრობლემის აღმოსაფხვრელად და როდის განახლდება მოძრაობა რკინიგზაზე.

„გაწმენდის სამუშაოები ჩავატარეთ, გუშინ საღამოს უკვე გაწმენდილი იყო ხიდის ნარჩენებისგან გზა. როგორ ვიცი, დარჩენილი იყო ელექტროსისტემასთან დაკავშირებული სამუშაოები. ავტოტრანსპორტს მოძრაობის მხრივ შეფერხება არ შექმნია,“ – გვითხრეს გზების დეპარტამენტში.

რაც შეეხება მატარებლებს, როგორც „საქართველოს რკინიგზაში“ გვითხრეს, სამგზავრო მატარებლების მოძრაობის განახლებას კიდევ რამდენიმე დღე დასჭირდება.

„ჩვენი მხრიდან, გუშინ ყველანაირი აღდგენითი და განახლებითი სამუშაოები დასრულდა. თუმცა ეს ტერიტორია გეოლოგების დაკვირვების ქვეშაა, რადგან ჯერ კიდევ არსებობს მეწყრის ხელმეორედ დაძვრის საფრთხე. ამიტომ ველოდებით გეოლოგების დასკვნას.

ტარდება მონიტორინგი და მას შემდეგ, რაც დასკვნების მიხედვით გვეცოდინება, რომ მეწყრის საშიშროება აღარ არის, ამის შემდეგ გავუშვებთ სამგზავრო მიმართულებას,“ – გვითხრეს „საქართველოს რკინიგზაში“.

დაახლოებით რამდენ დღეში უნდა წარმოადგინონ გეოლოგებმა დასკვნა, ზუსტი ინფორმაცია რკინიგზაში არ აქვთ. „დღეს და ხვალ რომ არ განახლდება სამგზავრო მიმართულება, ეს ვიცით“ – გვითხრეს რკინიგზაში.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com