„ახლა მოხუცებს დავუტოვეთ საჭმელი… ისევ მოხალისე ვარ, მაგრამ რეზერვისტად ჩავეწერე უკვე, ალბათ, ამაღამ მეც ომში წავალ,“ – ამბობს მირო ვანაძე, ის ბათუმელი სპორტსმენია და ბოლო 5 წელი უკრაინაში ცხოვრობს.
ომის დაწყების შემდეგ მირო ვანაძემ საქართველოში დაბრუნებას მოხალისეობა არჩია – ის პურს აცხობს და არიგებს კიევის ქუჩებში. მირო გვიყვება, რომ კიევის შემოგარენის, ასევე ჟიტომირსა და ჩერნოგოვზე განხორციელებული სამხედრო იერიშის შემდეგ კიდევ უფრო ნაკლები ადამიანი ჩნდება დედაქალაქის ქუჩაში.
„მარცხენა სანაპიროზე, სადაც მე ვცხოვრობ, ბლოკპოსტია და ალბათ იქ ვიქნებით. ყველას ეშინია, რადგან ვხედავთ, როგორ მიდიან ყველაფერზე რუსები. მაგრამ აქ ვინც არის, ჩემი აზრით, ყველა ბოლომდე იბრძოლებს თავისუფლებისთვის, ბოლომდე შეSწირავენ თავს,“ – მიიჩნევს მირო ვანაძე.
ქართველი სპორტსმენის თქმით, რუსული არმია მიზანმიმართულად ცდილობს პანიკის დათესვას.
„ყველგან ცდილობენ პანიკის შექმნას. ჩვენი, მოხალისეების შეშინებაც სცადეს. დამირეკეს და კონკრეტულ მისამართზე მთხოვეს მისვლა, შემდეგ გაირკვა, რომ დივერსანტები იყვნენ.
მათ უნდათ, რომ პანიკა გააჩინონ, ფსიქოლოგიური შეტევაა არამხოლოდ ჯარზე, არამედ მოსახლეობაზე, ხელისუფლებაზე.
ყველაფერი დაცარიელებულია. ქუჩებში იშვიათად ჩნდება ვინმე, მაღაზიებშიც… თავშესაფრებშია ხალხი. ზოგიც მიდის, მაგრამ ქვეყნის დატოვებაც საფრთხეა უკვე… მოხუცები არიან მხოლოდ ალაგ-ალაგ კორპუსებში… შუქს არ ანთებენ, ისე არიან მარტო.
ბოლომდე დანაყრებასა და დესერტზე აქ აღარავინ ფიქრობს. მთავარია, მშიერი არ დარჩე, რომ გადარჩე.
უკვე ფრონტის წინა ხაზია ყველგან და არა მხოლოდ ის ადგილი, სადაც ისვრიან,“ – ამბობს მირო ვანაძე.
—————
8 მარტი უკრაინაში რუსეთის ფედერაციის ჯარების შეჭრიდან მე-13 დღეა. რუსეთმა დაბომბა ქალაქებიც, დაღუპულია ასობით მშვიდობიანი მოქალაქე. ძირითადად ევროკავშირის ქვეყნების მიმართულებით ქვეყანა დატოვა 1.5 მილიონზე მეტმა ადამიანმა. ეს არის მეორე მსოფლიო ომის შემდეგ ევროპაში ყველაზე მასშტაბური და სწრაფი ლტოლვილთა კრიზისი.
