უკრაინაში ომის დაწყების შემდეგ, ანუ 24 თებერვლიდან, ბათუმში შუალედურ არჩევნებში მონაწილე კანდიდატებს საჯარო საარჩევნო აქტივობები აღარ აქვთ. „ქართული ოცნების“ კანდიდატი რამაზ ჯინჭარაძე ამბობს, რომ წინასაარჩევნო კამპანია ომის დაწყების შემდეგ გაურკვეველი ვადით შეწყვიტა, ხოლო ოპოზიციური ერთობის კანდიდატს, მათე ფუტკარაძეს, მხოლოდ კარდაკარ შეხვედრები აქვს.
ბათუმში შუალედური არჩევნები 2 აპრილს გაიმართება. ამ არჩევნებზე ბათუმის მე-4 მაჟორიტარულ ოლქში აირჩევენ ბათუმის საკრებულოს წევრს. ეს არჩევნები გადაწყვეტს, ბათუმის საკრებულო ოპოზიციური იქნება თუ „ქართული ოცნების“.
ბათუმის საკრებულოში 2021 წლის 2 ოქტომბრის არჩევნებში ოპოზიციამ უმრავლესობა მოიპოვა, თუმცა ბათუმის მე-4 მაჟორიტარული ოლქიდან არჩეული ნუგზარ ფუტკარაძე 2021 წლის 18 ნოემბერს გარდაიცვალა. 24 ნოემბერს კი „ერთიანმა ნაციონალურმა მოძრაობამ“ გაავრცელა აუდიოჩანაწერი, რაც, პარტიის მტკიცებით, ადასტურებს იმას, რომ ნუგზარ ფუტკარაძის მოსყიდვას ცდილობდნენ 100 ათასი დოლარის სანაცვლოდ. თანხმობის შემთხვევაში ოპოზიცია უმრავლესობას საკრებულოში დაკარგავდა.
„ნუგზარ ფუტკარაძის საქმეზე“ ამ დრომდე გამოძიებას არაფერი დაუდგენია.
„მხოლოდ კარდაკარ მაქვს მოსახლეობასთან შეხვედრა. უკრაინის მოვლენებთან დაკავშირებით ვცდილობ სოციალური ქსელებით აღარ ვიაქტიურო,“ – ამბობს მათე ფუტკარაძე, „ოპოზიციური ერთობის“ კანდიდატი. ის ბათუმის საკრებულოს გარდაცვლილი დეპუტატის – ნუგზარ ფუტკარაძის შვილია.
მათე ფუტკარაძეს ბოლო სტატუსი ფეისბუქში 4 მარტს დაუწერია უკრაინის ომზე და სოლიდარობის აქციაზე, როცა ვოლოდიმირ ზელენსკიმ მიმართა საქართველოს მოსახლეობას.
„მე ასეთი საქართველო მიყვარს, ერთიანი და გაუტეხელი,“ – წერს საკრებულოს წევრობის კანდიდატი.
მათე ფუტკარაძის ბოლო ფეისბუქპოსტი 4 მარტსაა გამოქვეყნებული
„სხვა აქტივობები შეჩერებული გვაქვს, ჰუმანიტარული დახმარების ამბავზეა გადართული მთლიანად პარტია, ოფისსაც მაგისთვის იყენებენ“, – აღნიშნავს მირდატ ქამადაძე, „ნაციონალური მოძრაობის“ ერთ-ერთი ლიდერი ბათუმში.
რუსეთ – უკრაინის ომს გამოეხმაურა ფეისბუქში რამაზ ჯინჭარაძეც, „ქართული ოცნების“ მაჟორიტარობის კანდიდატი. „ასეთ უსამართლობას უკრაინელი ხალხი არ იმსახურებდა, სოლიდარობა უკრაინას“, – დაწერა რამაზ ჯინჭარაძემ 24 თებერვალს.
რამაზ ჯინჭარაძის ფეისბუქპოსტი უკრაინის შესახებ
რამაზ ჯინჭარაძეს ამომრჩეველთან ბოლო შეხვედრა 24 თებერვალს გაუმართავს. ამ დღეს დაიწყო რუსეთმა ომი უკრაინაში. მანამდე რამაზ ჯინჭარაძე ყოველდღიურად ფეისბუქში აქვეყნებდა მოსახლეობასთან შეხვედრების ამსახველ ფოტოებს. კანდიდატს თან დაჰყვებოდნენ აჭარის მთავრობის მინისტრები, ასევე უმაღლესი საბჭოს წევრები.
„გაჩერებული ვართ, არ ვიცი, რა დროით,“ – გვიპასუხა რამაზ ჯინჭარაძემ. მან წინასაარჩევნო ხედვებზე სასაუბროდ ჯერჯერობით „ბათუმელებთან“ სასაუბროდ ვერ მოიცალა.
23 თებერვალს „ქართული ოცნების“ დეპუტატობის კანდიდატი ბათუმის იმ რამდენიმე ქუჩის მოსახლეობას შეხვედრია, ვისაც ამ დრომდე კანალიზაციის სისტემაც კი არ აქვს.
