ბათუმში დღეს, 26 თებერვალს, 18:00 საათზე, ევროპის მოედანზე უკრაინის მხარდასაჭერი აქცია გაიმართება. აქცია ფეისბუქზე ანონსდება. ამ აქციას 19:საათიდან მოძრაობა „სირცხვილია“ შეუერთდება, უფრო ადრე 16:00 საათზე აქციის გამართვას სტუდენტები გეგმავენ.
ბოლო რამდენიმე დღის განმავლობაში უკრაინის სოლიდარობის აქცია ბათუმში ევროპის მოედანზე, ასევე უკრაინის საკონსულოსთან, ყოველ საღამოს იმართება.
გუშინ, 25 თებერვალს, თბილისში, მთავრობის ადმინისტრაციასთან შეკრებილმა მოქალაქეებმა ირაკლი ღარიბაშვილის განცხადებებიც გააპროტესტეს, რომელმაც გუშინ თქვა, რომ საქართველო არ შეუერთდება სანქციებს რუსეთის წინააღმდეგ. აქციის მონაწილეები აცხადებდნენ, რომ ირაკლი ღარიბაშვილი საქართველოს მოსახლეობის უმრავლესობის აზრს არ გამოხატავს.
უკრაინის პრეზიდენტმა ვოლოდიმირ ზელენსკიმ მხარდაჭერისთვის აქციის მონაწილეებს მადლობა გადაუხადა.
„გასაოცარი ქართველი ხალხი, რომელიც ხვდება, რომ მეგობრებს მხარი უნდა დაუჭირო. მადლობა ყველას, ვინც თბილისსა და სხვა ქალაქებში უკრაინის მხარდასაჭერად და ომის წინააღმდეგ გამოვიდა. არის ხოლმე დრო, როცა ხალხი არ არის მთავრობა, მაგრამ მასზე უკეთესია“ ,- დაწერა ვოლოდიმირ ზელენსკი ტვიტერზე.
რუსეთი უკრაინის წინააღმდეგ სრულმასშტაბიან ომს აწარმოებს. რუსული ჯარები უკრაინაში შეიჭრა სამი მხრიდან – აღმოსავლეთიდან (ბელარუსი), ჩრდილოეთიდან (დონეცკი-ლუგანსკი) და სამხრეთიდან (ყირიმი). პარალელურად, არტილერია და ავიაცია ბომბავს უკრაინის ქალაქებს, მათ შორის დედაქალაქ კიევს.
რუსეთის პრეზიდენტი ვლადიმერ პუტინი აცხადებს, რომ მათი მიზანი „უკრაინის დემილიტარიზაცია და დენაციფიკაციაა“.
უკრაინის პრეზიდენტი ვოლოდიმირ ზელენსკი აცხადებს, რომ ის არსად წასვლას არ აპირებს.
