„უსაფრთხოების საბჭოს სხდომის გამართვა პიარის თანხლებით არ არის ჩვენი ხელწერა… უსაფრთხოების საბჭოს სხდომის გამართვა დღეს, ამ სიტუაციაში, არანაირ საჭიროებას არ წარმოადგენს,“ – აღნიშნა დღეს, 25 თებერვალს, პრემიერ-მინისტრმა ირაკლი ღარიბაშვილმა, როცა მას ჟურნალისტებმა ჰკითხეს, რატომ არ ტარდება უსაფრთხოების საბჭოს სხდომა რუსეთ-უკრაინის ომის პირობებში.
პრემიერმა ღარიბაშვილმა ჟურნალისტების კითხვებზე პასუხის გაცემის დროს რუსეთთან მიმართებით ორჯერ ახსენა სიტყვა „პრაგმატული“.
„ჩვენ ვახორციელებთ ეროვნულ და პრაგმატულ პოლიტიკას,“ – აღნიშნა პრემიერმა ირაკლი ღარიბაშვილმა. მან ხაზი გაუსვა იმასაც, რომ რუსეთთან დეესკალაცია შეძლო საქართველომ, ამ ომით უკრაინა დაზარალდება, ხოლო ეკონომიკურ სანქციებს რუსეთის წინააღმდეგ საქართველო არ შეუერთდება.
ღარიბაშვილმა სანქციებზე საუბრის დროსაც აქცენტი გააკეთა იმაზე, რომ პროტესტის და რუსეთზე წინააღმდეგობის გაწევის შემთხვევაში, საქართველო დაზარალდება.
„მინდა მკაფიოდ განვაცხადო, რომ საქართველო ეროვნული ინტერესების გათვალისწინებით არ აპირებს მონაწილეობა მიიღოს ფინანსურ და ეკონომიკურ სანქციებში, რადგან აღნიშნული გაცილებით მეტად დააზარალებს ჩვენს ქვეყანას და მოსახლეობას. უსარგებლო ხმაურია ოპოზიციიდან, პირიქით, ეს ეწინააღმდეგება ეროვნულ ინტერესებს… რა თქმა უნდა, პარლამენტში არ მივალ,“ – თქვა ირაკლი ღარიბაშვილმა.
„ჩვენ ევროსაბჭოში სრული პოლიტიკური მხარდაჭერა გამოვხატეთ უკრაინის მიმართ,“ – აღნიშნა ღარიბაშვილმა იმის პასუხად, თუ რას აკეთებს საქართველო უკრაინის მხარდასაჭერად.
უკრაინაში ომის პარალელურად, პრემიერი ღარიბაშვილი დარწმუნებულია, რომ საქართველოს საფრთხე არ ელის.
„რაც მინდა მკაფიოდ განვაცხადო, ჩვენ დღეს არავითარი საშიშროება არ გვაქვს, სიმშვიდე შევინარჩუნოთ,“ – დასძინა პრემიერმა.
