ბათუმის მუნიციპალური ინსპექციის ხელმძღვანელის, არჩილ კონცელიძის ინფორმაციით, ამ ეტაპზე ბათუმის სანაპიროზე „პიერ ბათუმის“ პირსს არ დაანგრევენ. მისივე ინფორმაციით, სასამართლომ მხოლოდ პირსის მიმდებარედ არსებული შენობებისა და კონსტრუქციების დემონტაჟზე მიიღო გადაწყვეტილება [მერიის გადაწყვეტილებებს კომპანია სასამართლოში ასაჩივრებდა].
პირსთან დაკავშირებით კი დავა გრძელდება.
35 მეტრი სიგრძის პირსი ბათუმის პლაჟზე შპს BATTUN-მა 2011 წელს უკანონოდ ააშენა, კომპანიას არც პროექტის გარემოზე ზემოქმედების ანგარიში მოუმზადებია.
პირსის შენობის აგება ბათუმის პლაჟზე მერიის ქონების მართვის სამსახურსა და შპს BATTUN-ს შორის შეთანხმების მთავარი პირობა იყო. ხელშეკრულება 2010 წელს გააფორმეს. სანაცვლოდ კომპანიამ ბათუმის მერიისგან პლაჟზე, ბულვარის მთავარ შესასვლელთან ახლოს, 7 392 კვ/მეტრი მიწის ნაკვეთი 29-წლიანი სარგებლობის უფლებით მიიღო.
შპს BATTUN-მა მერიასთან დადებული პირობა შეასრულა, თუმცა კომპანიამ პლაჟზე, ბულვარის მთავარ შესასვლელთან, 35 მეტრი სიგრძის პირსის შენობა ისე ააშენა, რომ არც სამშენებლო ნებართვა ჰქონია და არც გარემოზე ზემოქმედების შეფასების დოკუმენტი.
ამ ადგილზე კომპანიამ სპორტულ-გასართობი კომპლექსი „PIER BATUMI“ გახსნა. სახელშეკრულებო პირობა კომპანიის მხრიდან ბათუმის ბიუჯეტში ყოველწლიურად 15 000 ლარის ოდენობით საიჯარო გადასახადსაც ითვალისწინებდა.
გასართობი კომპლექსი ღია და დახურულ რესტორანს, ორ მაღაზიას, სწრაფი კვების ობიექტსა და ჩილიმ ბარს აერთიანებდა. ამ შენობების დემონტაჟი ბათუმის მუნიციპალურმა ინსპექციამ დღეს დაიწყო.
2013 წლის ნოემბერში კომპანია პირსის უკანონო მშენებლობის გამო 3000 ლარით დააჯარიმეს და ნებართვის მისაღებად სამთვიანი ვადა მისცეს. სამი თვის შემდეგ კი კომპანიას კანონმდებლობის შესაბამისად გაორმაგებული ჯარიმა 9 000 ლარი გადაახდევინეს. ამის შემდეგ კი საქმის განხილვა სასამართლომ დაიწყო.
