მთავარი,სიახლეები

რატომ იბარებენ ბათუმის პოლიციის №6 განყოფილებაში ჟურნალისტ ნათია ქარჩილაძეს

15.02.2022 • 3943
რატომ იბარებენ ბათუმის პოლიციის №6 განყოფილებაში ჟურნალისტ ნათია ქარჩილაძეს

„ბათუმის პოლიციის №6 განყოფილებიდან დღეს დამირეკეს და მითხრეს, შენზეც აღიძრა საქმე ადმინისტრაციული წესითო. როგორც გავიგე, პოლიციელების შეურაცხყოფას მედავებიან და განყოფილებაში შეჭრას,“ – უთხრა „ბათუმელებს“ ინტერნეტგამოცემა „მაუწყებლის“ ჟურნალისტმა ნათია ქარჩილაძემ.

საუბარია ბათუმში, პოლიციის №6 განყოფილებასთან 2021 წლის 17 დეკემბერს მომხდარ ინციდენტზე, რომლის შემდეგაც ჟურნალისტები გიორგი არობელიძე და რატი რატიანი ადმინისტრაციული წესით დააკავეს. ამ ჟურნალისტებმა გათავისუფლების შემდეგ თქვეს, რომ პოლიციელები მოქალაქე გიორგი ლორიაზე ძალადობდნენ და როცა მას გამოესარჩლნენ, მათაც სცემეს პოლიციის განყოფილებაში.

გიორგი არობელიძისა და რატი რატიანის ადმინისტრაციული საქმის განხილვა ბათუმის საქალაქო სასამართლოს ჯერ არ დაუსრულებია. ასევეб გამოძიებას ჯერ არ დაუდგენია, სცემეს თუ არა ნამდვილად პოლიციის განყოფილებაში მოქალაქეს და ჟურნალისტებს. სამაგიეროდ, ამ შემთხვევიდან თითქმის ორი თვის თავზე კიდევ ერთი ჟურნალისტი დაიბარეს პოლიციის განყოფილებაში და უთხრეს, რომ ისიც ბრალეულია.

„…მითხრეს, რომ ვადებს არ არღვევენ, ორი თვე ჯერ არაა გასული და სასამართლოზე გიორგის ადმინისტრაციული წესით პატიმრობას ვითხოვთო. ეს არის დაშინების მცდელობა ნაცვლად იმისა, რომ სიმართლე დაადგინონ,“ – მიიჩნევს ჟურნალისტი ნათია ქარჩილაძე.

ის გიორგი არობელიძის ცოლია და 17 დეკემბრის ღამით დაკავებულ გიორგისთან შეხვედრას ითხოვდა.

„მე ვიყავი პოლიციის შესასვლელთან და ვითხოვდი ეჩვენებინათ გიორგი, მაგრამ მასთან ტელეფონზე დალაპარაკების საშუალებაც არ მომცეს… ამას ვითხოვდი, რადგან იქიდან საშინელი ხმები გამოდიოდა. მას შემდეგ, რაც რატიც იქვე დააკავეს, მითხრეს, რომ დაკავებულებს წინასწარი დაკავების იზოლატორში გადაიყვანდნენ, იქ წავედი, მაგრამ დილის ექვს საათამდე არ დამალაპარაკეს გიორგის.

სასამართლოზე პოლიციელმა თქვა, რომ სათვალთვალო კამერები, რომელიც იღებს შენობის შიდა პერიმეტრს, რატომღაც ერთი თვის წინ გამორთეს.

მე არ ვაპირებ პოლიციის განყოფილებაში მისვლას. პოლიციელმაც მითხრა, მაშინ სასამართლოში შეხვდებით ერთმანეთსო,“ – გვითხრა ნათია ქარჩილაძემ.

ეს არაა პირველი შემთხვევა, როცა მოქალაქეები ამბობენ, რომ ბათუმის პოლიციის №6 განყოფილებაში მათ სცემეს. მაგალითად, ამ შენობიდან გამოსულმა მოქალაქემ, ირაკლი ქაჯაიამ, 5 წლის წინ – 2016 წელს თქვა, რომ პოლიციელებმა პოლიციის შენობაში მას ნეკნი ჩაუმტვრიეს. იმის მიუხედავად, რომ ამ საქმეში პირდაპირი მტკიცებულებებია იმაზე, რომ მოქალაქეზე პოლიციის განყოფილებაში ფიზიკურად იძალადეს, პროკურატურა დანაშაულზე ხუთი წელია არ რეაგირებს.

დაიწყო თუ არა ადმინისტრაციული საქმისწარმოება ნათია ქარჩილაძის წინააღმდეგ? – შინაგან საქმეთა სამინისტროს პრესცენტრიდან პასუხი არ მიგვიღია.

ამ თემაზე:

„ეს ცემამდე დაწერეთ, თუ ცემის შემდეგ?“ – კითხვა მე-6 განყოფილების პოლიციელებს

 

გადაბეჭდვის წესი


ასევე: