„თემურ ხასია დღეიდან უკვე აღარ მუშაობს ქალაქ ბათუმის მუნიციპალიტეტის მერიაში, გათავისუფლების ბრძანება დაწერილია უკვე,“ – აღნიშნა დღეს, 14 თებერვალს, არჩილ ჩიქოვანმა.
ბათუმის მერს ჟურნალისტებმა ჰკითხეს მერიის სპორტული ცენტრის დირექტორის, თემურ ხასიას შესახებ, რომელმაც გუშინ, მიწისძვრის შემდეგ ფეისბუქში დაწერა – „ერთი ბიძგი და ავარიული სახლების პრობლემა მოხსნილი გვაქვს“.
ბათუმის მერის, არჩილ ჩიქოვანის შეფასებით, თემურ ხასიას პოსტი ფეისბუქზე „არ ასახავს მერიის განწყობას“. მან ასევე თქვა, რომ პოსტის შემდეგ მყისიერი კომუნიკაცია ჰქონდა ჩინოვნიკთან:
„თემურ ხასიას მიერ გუშინ სოციალურ ქსელში გავრცელებული პოსტი არ ასახავს იმ განწყობას, რაც ქალაქ ბათუმის მუნიციპალიტეტის მერიას, პოლიტიკურ გუნდს გააჩნია ჩვენი თანამოქალაქეების მიმართ… მყისიერი კომუნიკაცია გვქონდა,“ – თქვა არჩილ ჩიქოვანმა.
თემურ ხასია „ქართული ოცნების“ აქტივისტია. ის თანამდებობაზე ბათუმის მერმა, არჩილ ჩიქოვანმა დანიშნა ორი თვის წინ.
თემურ ხასიას, როგორც „ოცნების“ აქტივისტის შესახებ, „ბათუმელები“ 2019 წელს წერდა, როცა „ალტერნატივას“ ხელმძღვანელს, ხათუნა ბერიძეს პარლამენტის წევრი – ანზორ ბოლქვაძე სასტუმროს დატოვებას აიძულებდა. გავრცელებულ ვიდეოჩანაწერში ჩანდა თემურ ხასიაც, რომელიც ასევე მოუწოდებდა ხათუნა ბერიძეს სასტუმრო დაეტოვებინა.
იმ პერიოდში თემურ ხასია ბათუმის მერიის საქალაქო და ინფრასტრუქტურის სამმართველოს მარკეტინგისა და პიარის სამსახურის თანამშრომელი იყო და „ქართული ოცნებიდან“ ხულოს მერობის კანდიდატის, ვახტანგ ბერიძის წინასაარჩევნო კამპანიაში იყო ჩართული.
