Batumelebi | რატომ იხარჯება ქვაფენილის აყრაში 8 მილიონი, როცა ადლიაში კანალიზაცია არ აქვთ – ჩიქოვანი განმარტავს რატომ იხარჯება ქვაფენილის აყრაში 8 მილიონი, როცა ადლიაში კანალიზაცია არ აქვთ – ჩიქოვანი განმარტავს – Batumelebi
ნეტგაზეთი • RU

რატომ იხარჯება ქვაფენილის აყრაში 8 მილიონი, როცა ადლიაში კანალიზაცია არ აქვთ – ჩიქოვანი განმარტავს

„მოსახლეობის მოთხოვნების შესაბამისად ნაწილდება,“ – გვიპასუხა ბათუმის მერმა არჩილ ჩიქოვანმა, როცა მას ვთხოვეთ განემარტა, როგორ ანაწილებს პრიორიტეტებს, როცა ქალაქში ქვაფენილის აყრასა და ხელახლა ასფალტის დაგებაში 8 მილიონი იხარჯება, ხოლო ქალაქის დასახლებებში – ადლიაში, აეროპორტის უბანში, კახაბერში, მახვილაურში, გონიოში, კვარიათში – კანალიზაციის სისტემაც კი არ აქვთ? 

მოსახლეობას, რომელიც ცხოვრობს ადლიაში ან ანგისაში არ მოუთხოვია კანალიზაციის სისტემა? – ვკითხეთ არჩილ ჩიქოვანს მას შემდეგ, როცა მან თქვა, რომ „მოთხოვნის შესაბამისად“ ანაწილებს პრიორიტეტებს.

„თქვენ არ ადევნებთ თვალს ჩვენს განცხადებებს. კიდევ ერთხელ უნდა განგიმარტოთ, რომ KFW-ს მე-5 ფაზა, რომელიც ხელმოწერის ეტაპზეა, სრულად უზრუნველყოფს შემოერთებულ ტერიტორიაზე წყალარინების სისტემების, ასევე წყლის სისტემების სრულად უზრუნველყოფას ჩვენი თანამოქალაქეებისთვის, რომელიც აუცილებლად განხორციელდება ისევე, როგორც სხვა მნიშვნელოვანი პროექტები,“ – გვითხრა ბათუმის მერმა.

რატომ არ მიიჩნია საჭიროდ მერიამ აქამდე მინიმუმ კანალიზაციის სისტემა მოეწყო შემოერთებულ ტერიტორიაზე და როდის დაიწყება ეს სამუშაოები? – კითხვის პასუხად არჩილ ჩიქოვანმა ის თქვა, რასაც ის ყველაზე ხშირად ახსენებს სხვადასხვა პრობლემაზე დასმულ კითხვაზე საუბრის დროს:

„შესაბამისი პროცედურების გავლის შემდეგ მალე დაიწყება,“ – გვიპასუხა არჩილ ჩიქოვანმა.

როდის დაიწყება ეს სამუშაოები და როდის დასრულდება? როდის იქნება, მაგალითად, ადლიის დასახლებაში კანალიზაციის სისტემა? – ვკითხეთ ისევ ბათუმის მერს და შევახსენეთ, რომ პასუხი სჭირდება ქალაქის ათასობით მცხოვრებს, სადაც თვე-ნახევარში ისევ არჩევნებია.

„გიპასუხეთ უკვე… მე ყველა შეკითხვას ვპასუხობ, მათ შორის, სამოქალაქო შეხვედრებზე, ღია ტიპის შეხვედრაზე,“ – დასძინა არჩილ ჩიქოვანმა „ბათუმელებთან“.

ნეტგაზეთის მასალების სხვა გამოცემებში გადაბეჭდვის წესი
ავტორი