ნეტგაზეთი • RU

ბულვარის სანაპირო ზოლის გადასარჩენად ბათუმში ოპოზიცია სამუშაო ჯგუფის შექმნას ითხოვს

ბათუმის საკრებულოს ოპოზიცია სამუშაო ჯგუფის შექმნას ითხოვს, რომელიც გაარკვევს, რა გზით არის შესაძლებელი ბათუმის სანაპიროს გადარჩენა. გუშინ, 5 თებერვალს, მორიგი შტორმის დროს, ბათუმის ახალი ბულვარში პრომინადის ნაწილი შტორმმა ჩამოშალა, დაზიანდა პლაჟის ინფრასტრუქტურა.

„ამ დროს ქალაქის მერი გამოვიდა და თქვა, რომ პრომინადი და პლაჟი დაასუფთავეს… სასწრაფო წესით საჭიროა, რომ შეჩერდეს ეს პროცესი.

ჩვენ ვითხოვთ სამუშაო ჯგუფის შექმნას, სადაც იქნებიან სპეციალისტები, მათ შორის, უცხოელი სპეციალისტები და გაიწერება მოკლევადიანი, ასევე გრძელვადიანი გეგმა, თუ რის გაკეთებაა საჭირო. 2012 წლიდან ამ დრომდე ბათუმის სანაპიროს ინერტული მასალით აღარ კვებავენ, ამიტომაც გვაქვს ეს რთული მდგომარეობა,“ – მიიჩნევს რეზო ხარაზი, ბათუმის საკრებულოს წევრი „ერთიანი ნაციონალური მოძრაობიდან“.

ის და საკრებულოს ოპოზიციის სხვა წევრები მერიისთვის წერილობით მიმართვას ხვალ, 7 თებერვალს, დილით აპირებენ.

ოპოზიცია ყურადღებას ამახვილებს ამ მიმართულებით სპეციალისტების აქამდე არაერთხელ გამოთქმულ მოსაზრებებზე – ექსპერტების აზრით,  ბათუმის სანაპიროს ხელოვნური კვების გარეშე მისი წარეცხვის საფრთხე არსებობს.

 

ნეტგაზეთის მასალების სხვა გამოცემებში გადაბეჭდვის წესი
ავტორი