„დღეს, თითოეულ თქვენგანს, ვინც აქ ესწრებით პრესკონფერენციას, შეგიძლიათ მიმართოთ ეროვნულ სატყეო სააგენტოს და მე თქვენ გარანტიას გაძლევთ, რომ თქვენთვის სასურველი ტყის ობიექტი, სათანადო პასუხისმგებლობის ფარგლებში, თქვენ გადმოგცენ, ასევე საიჯარო ვალდებულებებით“, – უთხრა დღეს, 31 იანვარს, გარემოს დაცვის და სოფლის მეურნეობის მინისტრმა ლევან დავითაშვილმა ჟურნალისტებს. ჟურნალისტებმა დღეს დავითაშვილს ჰკითხეს, ირაკლი ღარიბაშვილის მეუღლისთვის ბაკურიანში ტყის გადაცემაზე.
მინისტრის თქმით, ირაკლი ღარიბაშვილის მეუღლეს ტყე კი არ აჩუქეს, არამედ ვალდებულებებით გადასცეს. „ეს ჩუქება კი არ არის, არამედ ეს არის ვალდებულებები, რომ ტყეს მოუარონ სათანადო ვალდებულებებით და ამაში პლუს, სახელმწიფოს გადაუხადონ თანხა.
თქვენ რაზეც აპელირებთ, რომ ეს არის პრემიერ-მინისტრის ოჯახი, ან ვიღაც არის პრივილეგირებულ მდგომარეობაში, მოდით, ეს განვმარტოთ, რომ ეს იყო ღია წესით, ღია აუქციონის პირობებში და კანონმდებლობის შესაბამისად გადაწყვეტილი საიჯარო ხელშეკრულება.
თუ თქვენ მზად ხართ, რომ აიღოთ ის ვალდებულებები, რაც საიჯარო ხელშეკრულებაში იქნება გათვალისწინებული, თქვენც გადმოგცემთ ტყის ობიექტს. აქ არის ძირითადად ვალდებულებები, რომ ვიღაცამ შეასრულოს ტყის მოვლის კუთხით“, – განაცხადა დავითაშვილმა.
დაბა ბაკურიანში 5958 კვ/მ ფართობი ტყე 49 წლით სარგებლობაში პრემიერ ღარიბაშვილის ცოლს, ნუნუ თამაზაშვილს, გასული წლის დეკემბერში გადასცეს.
სახელმწიფო ქონების გადაცემა განხორციელდა ქონების ეროვნული სააგენტოს 2021 წლის 2 დეკემბრის ბრძანების საფუძველზე. ტყით სპეციალური სარგებლობის შესახებ ხელშეკრულება კი საჯარო რეესტრმა 28 დეკემბერს დაარეგისტრირა.
__________________
ამავე თემაზე:
10 ჰექტარი საბადურის ტყეში ნარმანიას ცოლის კომპანიას, რომელიც ვალდებულებებს არ ასრულებს
