Batumelebi | რატომ ცვლიან ბათუმში ქვაფენილს ასფალტის საფარით – მერიის არგუმენტები რატომ ცვლიან ბათუმში ქვაფენილს ასფალტის საფარით – მერიის არგუმენტები – Batumelebi
ნეტგაზეთი • RU

რატომ ცვლიან ბათუმში ქვაფენილს ასფალტის საფარით – მერიის არგუმენტები

„ძალიან ძვირი და შრომატევადია“ – ამ არგუმენტით მერია ქვაფენილს ბათუმის ქუჩებში ასფალტის საფარით ცვლის. ტენდერი რამდენიმე დღეში გამოცხადდება. ამ სამუშაოებისთვის სავარაუდოდ 8 მილიონი ლარი დაიხარჯება.

„ეს არ არის სერიოზული ხარჯი ამ ფართობისთვის,“ – ამბობს „ბათუმელებთან“ აკაკი ბერიძე, ბათუმის მერიის საქალაქო ინფრასტრუქტურის და კეთილმოწყობის სამმართველოს უფროსი. ის განმარტავს, რომ ქვაფენილს გრიბოედოვის ქუჩიდან ბარათაშვილის ქუჩამდე აყრიან, ასევე ფარნავაზ მეფისა და ვახტანგ გორგასლის ქუჩებზე – გორგილაძის ქუჩაზე მიერთებებით.

„გარდა ამისა, მოწესრიგდება ტროტუარები, ის არ დავიწროვდება, გამოიცვლება ბოძწკინტები და შეკეთდება ველობილიკები და სანიაღვრე არხები,“ – ამბობს აკაკი ბერიძე.

მას ასევე ვკითხეთ, რატომ არ მიიჩნია  საჭიროდ მერიამ ამ საკითხში საზოგადოების ჩართვა, ვიდრე გადაწყვეტილებას მიიღებდა. აკაკი ბერიძეს შევახსენეთ, რომ, მაგალითად, ბათუმის მერიამ გამოკითხვა ჩაატარა სოციალური ქსელით, როცა ქალაქში ახალი ავტობუსები შემოჰქონდათ.

„ავტობუსები გასაგებია… ქვაფენილები ეს არ იყო მხოლოდ ფარნავაზ მეფის და მიმდებარე ქუჩებზე მცხოვრები ადამიანების მოთხოვნა. მოსახლეობასთან შეხვედრების დროს, ზოგადად ქალაქში მუდმივად ფიქსირდებოდა ეს მოთხოვნა, რადგან ზიანდებოდა მანქანები. იყო შემთხვევა, როცა მოქალაქეც დაზიანდა.

გარდა ამისა, რთული იყო ქვაფენილის მოვლა-შენახვა. ყოველი გაწვიმების შემდეგ ქვაფენილებიდან მასა ჩაირეცხებოდა სანიაღვრე არხებში, შემდეგ კი, სატუმბ სადგურებსაც ჭედავდა. ეს ძალიან დიდ პრობლემებს ქმნიდა. ახლა მოვლა-შენახვის კუთხითაც გამარტივდება პროცესი,“ – ამბობს აკაკი ბერიძე, ბათუმის მერიის საქალაქო ინფრასტრუქტურის და კეთილმოწყობის სამმართველოს უფროსი.

რატომ მიანიჭა უპირატესობა მერიამ ქვაფენილის შეცვლის მოთხოვნას, როცა ბათუმში გაცილებით მწვავე პრობლემებია, მაგალითად, ქალაქის ნაწილს არ აქვს საკანალიზაციო სისტემა, ან საკმარისი საბავშვო ბაღები?

„სამი ახალი საბავშვო ბაღის მშენებლობა დაწყებულია… რაც შეეხება კანალიზაციის სისტემას, ეს კეთდება KFW-ის ფარგლებში და მიღწეულია შეთანხმება, როგორც ვიცი. ჩვენ შემოერთებულ ტერიტორიებზეც ვაწყობთ ქუჩებს, სტადიონებს, სკვერებს…“ – გვიპასუხა აკაკი ბერიძემ.

ბათუმში ქვაფენილის ასფალტის საფარით შეცვლის სამუშაოები სრულად 2023 წელს დასრულდება.

ნეტგაზეთის მასალების სხვა გამოცემებში გადაბეჭდვის წესი
ავტორი