დღეს, 26 ნოემბერს, ბათუმის საკრებულოს სხდომაზე „ნაციონალური მოძრაობის წევრმა“, მირდატ ქამადაძემ მძაფრსუნიანი ხსნარი პროტესტის ნიშნად დაღვარა.
მირდატ ქამადაძე, თანამოაზრეებთან ერთად, ბათუმის ძველი საკრებულოს მიერ ქალაქის 2022 წლის ბიუჯეტის დამტკიცებას აპროტესტებდა და იგი ასე შეეცადა სხდომის ჩაშლას.
მირდატ ქამადაძემ გვითხრა, რომ ხსნარი, რომელიც მან დღეს საკრებულოს სხდომაზე დაღვარა, ვეტერინარული პრეპარატი АСД-2Ф -ია.
პრეპარატი რუსული და უკრაინული წარმოებისაა და სოფლის მეურნეობაში მსხვილფეხა პირუტყვისა და ფრინველების სამკურნალოდ, პროფილაქტიკისთვის გამოიყენება.
ანოტაციაში აღნიშნულია, რომ პრეპარატს არ გააჩნია უკუჩვენება, თუმცა მისი მოხმარებისას საჭიროა უსაფრთხოების ისეთი ზომების დაცვა, როგორც სხვა პრეპარატების გამოყენებისას: ესაა კანზე ან თვალში მოხვედრის შემთხვევაში წყლის დიდი რაოდენობით ჩამობანა და ა.შ.
პრეპარატს საკმაოდ მძაფრი სუნი აქვს. იყენებენ ადამიანებიც, რუსულ ფორუმებსა და „იუთუბზე“ არაერთ მასალას ნახავთ, სადაც ამ პრეპარატის გამოყენებაზე წერენ.
АСД-2Ф დაღვარეს პარლამენტის პლენარულ სხდომაზე 2019 წლის 12 დეკემბერსაც.
ამავე თემაზე:
პრეპარატი, რომლის სუნის გამოც პარლამენტის სხდომა შეწყდა, ცხოველებისთვის გამოიყენება
