„ყველა ნორმა დაცულია,“ – ეს ორჯერ გაგვიმეორა დღევანდელ ბრიფინგზე „ქართული ოცნების“ ერთ-ერთმა ლიდერმა, ტიტე აროშიძემ, რომელსაც ვკითხეთ: რატომ არის „ქართული ოცნებისთვის“ პრინციპულად მიუღებელი, გაითვალისწინოს ამომრჩევლის ნება – ახალარჩეულმა საკრებულომ დაამტკიცოს ბათუმის ბიუჯეტი?
მიუხედავად იმისა, რომ საკრებულოს ახალი შემადგენლობა არჩეულია, ახალი ბიუჯეტის დამტკიცებას წინა მოწვევის საკრებულო აპირებს – ხვალ, 26 ნოემბერს.
„მათ უნდათ, რომ გააჩერონ მთლიანად ქალაქი და ამას არ დავუშვებთ… „ნაციონალურ მოძრაობასთან“ თანამშრომლობა არ შეიძლება. ყველაფერს აკეთებენ, რომ ქვეყანაში იყოს არეულობა და დესტაბილიზაცია,“ – განაცხადა ტიტე აროშიძემ ბრიფინგზე და დასძინა, რომ ენმ-ს ამის შესაძლებლობას არ მისცემენ.
„ყველა ნორმა დაცულია, ყველა პროცედურა გავლილია. შესაბამისად, არანაირი კანონი არ ირღვევა ხვალინდელ სხდომაზე,“ – ნორმებზე აქცენტირებით სცადა მმართველი პოლიტიკური პარტიის წევრმა კითხვის არიდება.
ტიტე აროშიძეს ჟურნალისტებმა გავახსენეთ ისიც, რომ 2017 წელს, როცა ახალი მოწვევის საკრებულო შეიკრიბა, მაშინაც ახალმა შემადგენლობამ დაამტკიცა შემდეგი წლის ბიუჯეტი და შემდეგ წლებშიც დეკემბრის ბოლოს მტკიცდებოდა ბიუჯეტი.
ტიტე აროშიძეს ვკითხეთ საკრებულოსგან მერიის კონტროლის უფლებაზეც, რაც ამ შემთხვევაში საკრებულოს არ მიეცემა, რადგან ბიუჯეტი მას არ ექნება დამტკიცებული.
„დამტკიცებული ბიუჯეტის გაკონტროლება შეეძლება, რა თქმა უნდა, ახალი მოწვევის საკრებულოს,“ – გამოსავალი იპოვა ტიტე აროშიძემ.
კითხვების დასმამდე ტიტე აროშიძემ სამართალდამცავებს მოსთხოვა ხვალინდელი სხდომის „ნორმალურ პირობებში ჩატარება“.
დღევანდელ ბრიფინგზე ტიტე აროშიძე გამოეხმაურა ენმ-ს მიერ გავრცელებულ აუდიო ჩანაწერს, რომლის მიხედვითაც საკრებულოს წევრის, ნუგზარ ფუტკარაძის სავარაუდოდ მოსყიდვას „ქართული ოცნება“ 100 ათას დოლარად ცდილობდა.
„გამოძიება დაწყებულია და ყველა კითხვას გასცემს პასუხს,“ – აღნიშნა ტიტე აროშიძემ. მას ვუთხარით, რომ შინაგან საქმეთა სამინისტრომ, ასევე პროკურატურამ უარი თქვა სავარაუდო მოსყიდვის ფაქტის გამოძიებაზე.
გამოძიება შსს-მ 18 ნოემბერს დაიწყო, როცა ბათუმის საკრებულოს წევრი ენმ-დან ნუგზარ ფუტკარაძე გარდაიცვალა და ამ საქმის ფარგლებში დაიბარეს დღეს გამოსაკითხად რამდენიმე ოპოზიციონერი. გამოძიებას, მაგალითად, ამ დრომდე არ დაუწყია იმ ჩანაწერის ავთენტურობის კვლევა, სადაც საკრებულოს წევრის სავარაუდო მოსყიდვაა ასახული.
„არ ვარ კომპეტენტური, რა დეტალებს შეიცავს გამოძიება,“ – აღნიშნა ტიტე აროშიძემ.
კიდევ ერთი მნიშვნელოვანი გარემოება – ჩანაწერი ნამდვილიც რომ იყოს, „ქართული ოცნების“ ერთ-ერთი ლიდერი, ტიტე აროშიძე ზეწოლას ვერ ხედავს იმ ჩანაწერში, რაც გუშინ გავრცელდა ნუგზარ ფუტკარაძის შესახებ.
„გამოძიება დაადგენს ამ ჩანაწერის ავთენტურობას, თუმცა მის გარეშეც შეგვიძლია ვთქვათ, რომ ნუგზარ ფუტკარაძის მიმართ ზეწოლა არ ფიქსირდება…“ – მიიჩნევს ტიტე აროშიძე. მან ხაზი გაუსვა იმასაც, რომ პირები, რომლებიც ჩანაწერში ფიგურირებენ, არ აქვთ კავშირი „ქართულ ოცნებასთან“.
