„საგამოძიებო ორგანო ვალდებულია დაიწყოს გამოძიება დანაშაულის შესახებ ინფორმაციის მიღებისთანავე,“ – ამბობს პაატა დიასამიძე, საია-ს აჭარის ფილიალის ხელმძღვანელი, რომელსაც ვკითხეთ: რას ნიშნავს, როცა საკრებულოს წევრის სავარაუდო მოსყიდვის შესახებ ინფორმაცია ვრცელდება, მაგრამ გამოძიება არ იწყება.
შინაგან საქმეთა სამინისტროს, ასევე პროკურატურის პრესცენტრის ინფორმაციით, ამ დრომდე სავარაუდო მოსყიდვის ამ შემთხვევაზე გამოძიება არ დაწყებულა.
საუბარია 24 ნოემბერს „ნაციონალური მოძრაობის“ მიერ გამოქვეყნებულ აუდიოფაილზე, რაც ენმ-ს ლიდერების მტკიცებით, ბათუმის საკრებულოში ენმ-ს წევრის, ნუგზარ ფუტკარაძის მოსყიდვას ასახავს. ნუგზარ ფუტკარაძე 18 ნოემბერს გარდაიცვალა.
„გამოძიების არდაწყება კანონის დარღვევაა. გამოძიების დაწყების საფუძველია, მათ შორის, მასობრივი საინფორმაციო საშუალებებით გავრცელებული ინფორმაცია,“ – აღნიშნავს საია-ს იურისტი პაატა დიასამიძე.
ენმ-ს ერთ-ერთი ლიდერი, გიორგი კირთაძე ამბობს, რომ ჩანაწერის მიხედვით, ნუგზარ ფუტკარაძეს 100 ათას დოლარს სთავაზობდნენ დავით რიჟვაძის დავალებით [თორნიკე რიჟვაძის მამა] ვაჟა თაბაგიძე და ბადრი ბაკურიძე. ეს პირები ასლან აბაშიძის ხელისუფლებაში მუშაობდნენ.
გავრცელებულ ჩანაწერში 3 კაცი საუბრობს, ენმ-ის თქმით, მათგან ერთი თავად ნუგზარ ფუტკარაძეა. ჩანაწერში ისმის, რომ მის თანამოსაუბრეებს ბადრი და ვაჟა ჰქვიათ. ისინი ფუტკარაძეს ეუბნებიან, რომ მასთან მოსალაპარაკებლად გამოგზავნა კაცმა, რომელსაც ისიც იცნობს, თუმცა არ ასახელებენ მის ვინაობას. ჩანაწერში მკაფიოდ ისმის, რომ ბადრი და ვაჟა გარიგებას სთავაზობენ ნუგზარ ფუტკარაძეს – გახდეს საკრებულოს დამოუკიდებელი დეპუტატი. ჩანაწერში არ ისმის ფულის შეთავაზების შესახებ და არ სახელდება კონკრეტული თანხა, თუმცა, ერთ მონაკვეთში ირკვევა, რომ სავარაუდოდ, შეთავაზებული თანხა ნუგზარ ფუტკარაძეს ფურცელზე დაუწერეს.
ჩანაწერში ისმის, რომ თანამოსაუბრეები ფუტკარაძეს ამ თანხის 80 პროცენტს სთავაზობენ, თავად კი 20 პროცენტის მიღება სურთ.
ნუგზარ ფუტკარაძე ბათუმის ახალი საკრებულოს წევრი იყო ენმ-დან. მის გარდაცვალებამდე ოპოზიციას ბათუმის საკრებულოში უმრავლესობა ჰქონდა – ამჯერად მანდატები 35-წევრიან საკრებულოში ასე ნაწილდება: „ქართული ოცნება“ – 16 წევრი, ენმ – 14 წევრი, „გახარია საქართველოსთვის“ – 2 წევრი, ლელო – 1 წევრი, დამოუკიდებელი კანდიდატი – 1 წევრი. ეს უკანასკნელი გახარიას გუნდს წარმოადგენდა, მაგრამ არჩევნების შემდეგ პარტია დატოვა.
ამ თემაზე:
საუბრის ზუსტი ჩანაწერი – ბათუმის საკრებულოში ენმ-ს წევრის სავარაუდო მოსყიდვის მცდელობა
