Batumelebi | ვადაგასულები ხართ – დაპირისპირება ბათუმის საკრებულოს ბიუროს სხდომაზე [LIVE] ვადაგასულები ხართ – დაპირისპირება ბათუმის საკრებულოს ბიუროს სხდომაზე [LIVE] – Batumelebi
RU | GE  

ვადაგასულები ხართ – დაპირისპირება ბათუმის საკრებულოს ბიუროს სხდომაზე [LIVE]

ბათუმის საკრებულოს ბიუროს სხდომაზე ხმაურია. ახლად არჩეული საკრებულოს წევრები 2017 წელს არჩეული საკრებულოს წევრებს დაუპირისპირდნენ. ძველი მოწვევის საკრებულო ბიუროს სხდომას მართავდა, რა დროსაც შენობაში ოპოზიცია, მათ შორის, ახლად არჩეული საკრებულოს წევრები შევიდნენ.

„ვადაგასულები ხართ. 2017 წლის არჩეული საკრებულო რატომ მიმტკიცებს 2022 წლის ბიუჯეტს?“ – ჰკითხა ირაკლი კუპრაძემ ბათუმის საკრებულოს წევრებს და საკრებულოს თავმჯდომარეს სულიკო თებიძეს.

საკრებულოს შენობაში პოლიცია შევიდა და ახლად არჩეული საკრებულოს წევრები შენობიდან, ბიუროს სხდომის ოთახიდან გამოიყვანა. ბიუროს სხდომიდან გამოიყვანეს მირდატ ქამადაძეც, რომელიც ძველი მოწვევის საკრებულოს წევრია ენმ-დან.

„არჩევნები რატომ ჩავატარეთ, თუ ძველი საკრებულო უნდა იყოს? ბიუროს წევრი ვარ, ყველამ ნახეთ, როგორ გამომიყვანეს გარეთ. კომპარტიის წევრები სხედან ახლა და ცდილობენ მიიღონ 2022 წლის ბიუჯეტი. ბიძინა ივანიშვილი პოლიციის ძალით არჩევნებს აუქმებს,“- თქვა მირდატ ქამადაძემ მას შემდეგ, რაც მას ბიუროს სხდომა დაატოვებინეს.

“ეს არის თვითთმმართველობის დასამარება საქართველოში,” –  ასე შეაფასა ბათუმის მერობის კანდიდატმა გიორგი კირთაძემ მიმდინარე მოვლენები.

„ვადაგასული მონები ხართ,“ „ვადაგასული სულიკოს დაცვა ხართ“, „მაგიტომ გაცვიათ ფორმა, რომ სულიკოს დაცვა იყოთ?“ – ისმოდა ოპოზიციის შეძახილები პოლიციის მისამართით ბათუმის საკრებულოს შენობაში.

ხვალ, 26 ნოემბერს, 11:00 საათზე ბათუმის საკრებულოს რიგგარეშე სხდომაა ჩანიშნული. „ერთიანი ნაციონალური მოძრაობის“ წევრების ინფორმაციით, ბათუმის საკრებულო აპირებს ხვალ ბათუმის 2022 წლის ბიუჯეტი დაამტკიცოს.

ნეტგაზეთის მასალების სხვა გამოცემებში გადაბეჭდვის წესი
ავტორი