Batumelebi | საუბრის ზუსტი ჩანაწერი – ბათუმის საკრებულოში ენმ-ს წევრის სავარაუდო მოსყიდვის მცდელობა საუბრის ზუსტი ჩანაწერი – ბათუმის საკრებულოში ენმ-ს წევრის სავარაუდო მოსყიდვის მცდელობა – Batumelebi
RU | GE  

საუბრის ზუსტი ჩანაწერი – ბათუმის საკრებულოში ენმ-ს წევრის სავარაუდო მოსყიდვის მცდელობა

დღეს, 24 ნოემბერს, „ერთიანმა ნაციონალურმა მოძრაობამ“ ბათუმში ბრიფინგი გამართა და განაცხადა, რომ მმართველი პარტია, „ქართული ოცნება“, ბათუმის საკრებულოს წევრის, ნუგზარ ფუტკარაძის მოსყიდვას და გადაბირებას ცდილობდა. სანაცვლოდ მას 100 000 დოლარი შეთავაზეს. პარტიამ ამის დასადასტურებლად აუდიო ჩანაწერის მოკლე ვერსიაც გაავცელა.

ნუგზარ ფუტკარაძე ბათუმის ახალი საკრებულოს წევრი იყო ენმ-დან. იგი 18 ნოემბერს გარდაიცვალა. მის გარდაცვალებამდე ოპოზიციას ბათუმის საკრებულოში უმრავლესობა ჰქონდა – ამჯერად მანდატები 35-წევრიან საკრებულოში ასე ნაწილდება: „ქართული ოცნება“ – 16 წევრი, ენმ – 14 წევრი, „გახარია საქართველოსთვის“ – 2 წევრი, ლელო – 1 წევრი, დამოუკიდებელი კანდიდატი – 1 წევრი. ეს უკანასკნელი გახარიას გუნდს წარმოადგენდა, მაგრამ არჩევნების შემდეგ პარტია დატოვა.

„ერთიანი ნაციონალური მოძრაობის“ ინფორმაციით, აუდიო ჩანაწერი თავად ნუგზარ ფუტკარაძემ გააკეთა. დღეს ენმ-ის ლიდერმა ბათუმში, გიორგი კაირთაძემ განაცხადა, რომ ნუგზარ ფუტკარაძეს 100 ათას დოლარს სთავაზობდნენ აჭარის მთავრობის თავმჯდომარის, თორნიკე რიჟვაძის მამის, დავით რიჟვაძის დავალებით ვაჟა თაბაგიძე და ბადრი ბაკურიძე.

„ბათუმელები“ მთლიან აუდიო ჩანაწერს გაეცნო.

ჩანაწერში 3 კაცი საუბრობს, ენმ-ის თქმით, მათგან ერთი თავად ნუგზარ ფუტკარაძეა. ჩანაწერში ისმის, რომ მის თანამოსაუბრეებს ბადრი და ვაჟა ჰქვიათ. ისინი ფუტკარაძეს ეუბნებიან, რომ მასთან მოსალაპარაკებლად გამოგზავნა კაცმა, რომელსაც ისიც იცნობს, თუმცა არ ასახელებენ მის ვინაობას.

ჩანაწერში მკაფიოდ ისმის, რომ ბადრი და ვაჟა გარიგებას სთავაზობენ ნუგზარ ფუტკარაძეს – გახდეს საკრებულოს დამოუკიდებელი დეპუტატი. ჩანაწერში არ ისმის ფულის შეთავაზების შესახებ და არ სახელდება კონკრეტული თანხა, თუმცა, ერთ მონაკვეთში ირკვევა, რომ სავარაუდოდ, შეთავაზებული თანხა, ნუგზარ ფუტკარაძეს ფურცელზე დაუწერეს.

ჩანაწერში ისმის, რომ თანამოსაუბრეები ფუტკარაძეს ამ თანხის 80 პროცენტს სთავაზობენ, თავად კი 20 პროცენტის მიღება სურთ.

აუდიოჩანაწერი 45 წუთს გრძელდება და პირადი სახის საუბარსაც შეიცავს. „ბათუმელები“ გთავაზობთ ჩანაწერიდან ზუსტად იმ მონაკვეთებს, რომელიც მოსყიდვას ეხება. საუბარი ქვეყნდება სტილის დაცვით, მცირე შემოკლებით.

_____________________________________

ბადრი: ახლა 2 წუთი დაჯე და რაღაცა უნდა გკითხო შენ.

ნუგზარ ფუტკარაძე: მკითხე.

ბადრი: ჩემთან მოსული იყო ჩემი ოჯახის წევრი. იცი შენ ჩემი დამოკიდებულება, ურთიერთობა მოყოლებული იმ დროიდან… მე შეკითხვა მივეცი, რატომ ჩემთან მოდი-თქვა. შენს ძმაკაცზე ვიცი თქვენი დამოკიდებულება, ამიტომაცო, ჩავთვალე, რომ შენს სიტყვას ფასი აქვს და ნდობა აქვს, ვიდრეო…

ნუგზარ ფუტკარაძე: არ უნდა, გეველ ბოლოში.

ბადრი: ამიტომ მე და აგერ, ვაჟაი, ძმაია, იცი, ოჯახის წევრია. ჩვენი საუბარი ჩვენში მოკდება და დარჩება. იმის იქით ვერ გავა. მითხრა, ამ კაცს ძმობაში და კაცობაში დეელაპარაკეო.

ნუგზარ ფუტკარაძე: გააგრძელე.

ბადრი: რომ იქა ხომ არისო და მის მიღწევას მიაღწიაო, მივესალმებით, მაგრამო, არის ამასთან ერთად ჩვენი საერთო თემაო, სადაც საჭირო არის ნეიტრალი.

ნუგზარ ფუტკარაძე: ჭკვიანი ყოფილა, ჭკვიანი კაცი… გევედი ბოლოში, აღარ მინდა. გადასვლა, გადმოსვლა, გადახტომა, გადმოხტომა…

ბადრი: ნეიტრალიო.

ნუგზარ ფუტკარაძე: ნეიტრალი? მე მაშინაც გითხარი, გახსოვს, მაშინაც გითხარი, რომ მე ქალაქში დავდივარ და იცით თქვენ, ლამაზად, ყველაფერი… ვინმე არ მაგინებს… მე მაქ საგინებელს არაფერს არ გავაკეთებ. ვიცი რაფერ მევქცე. იმ კაცს, ვინცხამ გითხრა, არ გეკითხები…

ბადრი: არა, იცნობ იმ კაცს, იმ კაცთან ძაან კაი ურთიერთობა გაქ, ჩვენი ოჯახის წევრია…

ნუგზარ ფუტკარაძე: ვინაა მითხარი…

ბადრი: ჩვენი ოჯახის წევრია და დამასრულებიე… ყველაფერს ხომ მისი წესი აქვს.

ამის შემდეგ საუბარი გრძელდება სხვა თემაზე, თუმცა თანამოსაუბრეები მალევე უბრუნდებიან საუბრის მთავარ თემას.

ბადრი: ჩვენ გვჭირდება. თემას ჭირდება. ნეიტრალი ხომ მიიღე, ნეიტრალი ნიშნავს, არც იქეთ ხარ და არც აქეთ ხარ. და მხარდაჭერა ჭირდებიან შენი, მაგრამ ამ ყველაფერს აქვს მისი სწორი მიდგომა. ახლა რაში მდგომარეობს… მე რომ არ გითხრა და არ გირჩიო, ხვალ-ზეგე ჩვენ უნდა ვიცხოვროთ, შენ მეტყვი, რომ არ ხარ მართალი… ამიტომ თემა დგას ასე დღის წესრიგში. ენდობიო? – კი. ნეიტრალი თემაო – მითხრა და ცხოვრებას, ყველაფერს მისი სწორი მიმართვა აქ, ეს ძმობაში გაგვიკეთოსო და ჩვენი მხრიდან რაც საჭიროა, კაცობაში, პიროვნულადო და სამსახური…

ნუგზარ ფუტკარაძე: ვინ იყო? ვინ კაცი იყო? გვარი მითხარი.

ბადრი: არა.

ნუგზარ ფუტკარაძე: ხვალ და ზეგ გევგებ მაშინ.

ბადრი: დავასრულებ.

ნუგზარ ფუტკარაძე: მისმინე ახლა, შემომხედე. მე რომ მთლად რომ თავი გამევდვა და გავშტერდე, მასე ვერ გავაკეთებებ. არც შამფურს დავწვავ და…

ბადრი: აი-ო, ჩემსგან იქნება… [სავარაუდოდ, სწორედ ამ დროს დაუწერეს ნუგზარ ფუტკარაძეს ფურცელზე შეთავაზებული თანხა]. 

ნუგზარ ფუტკარაძე: არ მინდა არაფერი.

ბადრი: არა, მე უნდა გითხრა შენ. … ძმაკაცები ვართ. გააჩნია ვინ მოვიდოდა. ჩემი ოჯახის წევრია.

ნუგზარ ფუტკარაძე: არ მინდა მე მაი, აქამდე არ მქონია… შემომხედე. მე ძალიან თავს არ გამევდებ ახლა… რომ მიხდენ იქ ჩემებმაც, გეიგე?! თლათ რომ იგი რა ქვია. მარა მე რომ არც შამფურს დავწვავ და არც ხორცს დავწვავ, მაი იქნება.

ვაჟა: მე ხომ ბაბუს [ასლან აბაშიძეს] გადავყევი, მე დავრჩი ბოლო ბაბუსთან და მომ… კაცმა მიმატია…. მე კი არა, ბარე ორი. და იმას ვფიქრობდი სულ, რომ ნეტაი რაცხა მეკეთებია და გამეკეთებია… შენ იჭერ ნეიტრალურ სიტუაციას, ხალხი გამოდის, ხალხი რა, ჩვენი ურთიერთობიდან, ვინც მოვიდა ჩვენთან… ეს არის რაფერი იცი?! ჰალალად რომ შეგერგება.

ნუგზარ ფუტკარაძე: არ მინდა მე…

ბადრი: რაფერ არა…

ნუგზარ ფუტკარაძე: ჯობია, კარგად ვიქნები მე, იმასთანაც, იმასთანაც…. მაი თემა რაფერია ვაჟა იცი?! მაგას რომ იმას იქ, მაშინ ხარ პრ..ი, საქმის გამკეთებელი არ ხარ, დამანებეთ თავი. მე ყოველთვის ვიქნები ისე, რომ ვინმე არ დეწვება, იმათაც გოუხარდებიან, იმათაც გოუხარდებიან… ძალიან დიდი გადასაწყვეტი იქნება, მე გავხდები ავად.

ბადრი: ავად რომ გახდები, ხომ დარჩება საკითხი… პირობითად ვლაპარაკობ.

ნუგზარ ფუტკარაძე: არ დარჩება.

ჩანაწერში ისმის, რომ ნუგზარ ფუტკარაძის თანამოსაუბრეები პოლიციაში მუშაობდნენ. ახსენებენ სამსახურს, წარსულს. ერთ-ერთი მათგანი ნუგზარ ფუტკარაძეს ურჩევს, ისარგებლოს შემთხვევით.

ბადრი: დღეს სხვა ცხოვრებაა ხომ? სწორი შანსი გაქ ახლა შენ?

ნუგზარ ფუტკარაძე: მე შეიძლება დამარტყას ხვალ-ზეგ… წინა დღეს კინაღამ მოვკვდი.

ბადრი: ამას შენ სწორად უნდა მისცე შენი მხრიდან პოზიცია, მე ასე ვიზამ და ეს არ ნიშნავს, რომ შენ, ვაიმე, ჩემს ხარჯზე გადახტი წყალში მეთქი… რა გინდა მეტი რა… ოჯახის წევრია, მე რამე ანგარება არ მაქ იმასთან.

ვაჟა: ეს სტუაცია მე გავიარე. მე რაც გადამხდა… 300 000 ევრო ფული მაძლიეს. პირდაპირ გაჭრილად გეუბნები. მაგრამ ჩემი გამოყ…ი ჭკვით, ეს დავკარგე. ყველაი ფიქრობს, ვინმე ბობოლაი თუ არის, ყველაი მათთვის ფიქრობს ყველაფერს. კი, მოხდა სიტუაცია, მოვიდა „ოცნება“, დავბრუნდი, მშვიდობიანად ვართ და ლამაზად, მე „ოცნების“ სიტუაციაში, ზაზაიდან [საუბრის სრული ვერსიის ჩანაწერის თანახმად, გულისხმობენ ზაზა დიასამიძეს, ხელვაჩაურის ახალ მერს] გამომდინარე, გადავყევი, გადავყევი… მარა გეტყვი პირდაპირ. ეს შანსი რომ გამიჩნდეს ხომ… პოლიტიკა არის ბიძნური, დედა….ი საქმე…

ნუგზარ ფუტკარაძე: ვიცი, ვიცი..

ვაჟა: რაზე არ უნდა გამოვრჩე… ბ..ი ვიყო, თუ გულით არ ვამბობდე.

ნუგზარ ფუტკარაძე: არა, მე რაცხა ვერ წარმომიდგენია… მე ძალიან შემცვალა „რაზვეტკაში“ მუშაობამ.. მე რომ პოლიციაში ვიყავი, ფული ვინმესგან ასე ხელში არ იმიღია, დეიჯერებ? …დეველოდოთ მოვლენებს.

ბადრი: ეს თემა იქნება ჩვენთან, ჩემი პირადი თხოვნაა, ამ კაცის, ვაჟაის და იმ კაცის, რომ, ნეიტრალური თემა ეს იმას ნიშნავს ბადრი, სწორად გეიგეო, რომ ჩვენი პოზიცია რომ იქნებაო, ანუ კანონის ამბავი… ჩვენო, მან და მეო, შევჯერდებით საკითხებშიო და ეს იქნება ესო, სხვა არაფერი.

ნუგზარ ფუტკარაძე: ალბათ იქ მუშაობს მერიაში?

ბადრი: ვინ?

ნუგზარ ფუტკარაძე: ის კაცი.

ბადრი: ბიჭო, შენ პირდაპირ შეხვდები ჩვენ ძმას, სხვას არავის. რაფერც შენ ჩემთან ძმაკაცობ…

ნუგზარ ფუტკარაძე: დევწყოთ, შევხდები, რა გინდა.. რაცხა უნდებიან დევეხმარები. დანარჩენი არ მინდა, ბადრი.

ბადრი: ეს თემა აღებულია ვარიანტში….

ვაჟა: მაგფერი თემა არ დეიკარგება…

ბადრი: ხომ სხვა ინტერესი არ მაქ, მე მაქვს შენი პიროვნული თემა, იმ კაცის პიროვნული თემა… მე რო მენდეს, მე მადლობა ვუთხარი. ვაჟას ვუთხარი, მე შენ ერთად, ძმობაში დევილაპარიკებ, იმან იცის, რომ მე რომ სიტყვას ვიტყვი, იქ დარჩება. ასე მიცხოვრია დღემდე და ასე მოვკვდები ბოლომდე. ესაა მნიშვნელოვანი ჩვენთვის.

…მე ვუთხარი, რაზეა საუბარი, მის მაგივრად მე პასუხს არ გაგცემ, ჩვენ თემა გვაქ დაწყებული და აუცილებლად მაგ თემაზე დეველაპარაკები და მე ვფიქრობ, რომ დადებითად გადაწყდება-მეთქი. აი, ეს ამბავი გამოსულიაო, ეს თემა გამოსულიაო და დანარჩენს თქვენ მიხედეთ, ოღონდ მე მერე შევხდები, რომ ჩამოყალიბდეთ თემაშიო.

ნუგზარ ფუტკარაძე: ფულზე არ ვილაპარაკოთ რა, გეხვეწები… თუ გინდა მინდა, თუ გინდა იმას თავს დუუქნევ და აწიეთ და თქვენი იყოს, მიჩუქნია…

ბადრი: შვილები გყავს? ცოლი გყავს? შვილი? ბინა გინდა შენზე? უკრაინაში წიმიყვან? გამაგულავებ? მაი პატივისცემა არაა? მეტი რა გითხრა, მე ხომ არ გეუბნები სხვა რამეს…

ნუგზარ ფუტკარაძე: ვერ ავდგები და დავუშვათ და ვერ გავაკეთებ განცხადებას, რომ დავტოვე ნაციონალური მოძრაობა და გადავედი სხვა, ოპოზიციაში და ვარ დამოუკიდებელი დეპუტატი. ამას მე არასდროს არ ვიტყვი, გამიგე? მარა იქ რაღაც-რაღაცა მიღებაში მე მხარს დავუჭერ კანონს. რაცხა უნდებიან, იმას მხარს დუუჭერ.

ვაჟა: ნეიტრალურის გამოცხადებაში რა არის? არც იქეთ ვარ, არც აქეთ.

ნუგზარ ფუტკარაძე: არა, მაგას არ ვიტყვი. მაი პ…ჭი ხარ მაშინ. არა, მაგას არა…

ვაჟა: რა, რანაირად უყურებ ამ ცხოვრებას ბიჭო…

ნუგზარ ფუტკარაძე: არა, რატომ… მე იქიდან ვიყარე კენჭი, არ ვიტყვი მაგას. არასდროს არ ვიტყვი მაგას. გეხვეწებით რა, მაი არ მითხრათ მეტი. მარა იქ, კანონების მიღებაში, მე მხარს დავუჭერ, რომ მართლა მხარდასაჭერი იქნება, მხარს დავუჭერ.

ბადრი: შეიძლება დადგეს მერის იმპიჩმენტის საკითხი. ვის დუუჭერ მხარს? პირობითად გეკითხები?

ნუგზარ ფუტკარაძე: მერის იმპიჩმენტის საკითხი არასდროს არ დადგება, ეს იცოდე. არასდროს არ დადგება.

ბადრი: ჰო.

ნუგზარ ფუტკარაძე: მერის იმპიჩმენტის საკითხი არასდროს არ დადგება, არ შემეკითხო რატომ, მაგრამ არ დადგება.

ვაჟა: მე ვხდები.

ბადრი: თუ ხდები კაია, მე ახლა ვერ მივხვდი.

ვაჟა: ყოველთვის თვლიან მაგას მათიანებად და.

ბადრი: ჩვენ როგორ ჩამოვყალიბდით ძმობაში.

ნუგზარ ფუტკარაძე: რაფერ ჩამოვყალიბდით და მე სადაც ვარ იქ ვიქნები და მე ყოველთვის კანონიერებას და საქმიდან გამომდინარე, არც შამფურს დავწვავ და არც ხორცს.

ბადრი: არა ახლა, საკითხებში მაი

ნუგზარ ფუტკარაძე: ბევრ საკითხებში დევეთანხმები. დავაი, კარგად.

ბადრი: მოიცა, რა კარგად. ვერ გევიგე, დავასრულოთ ნუგზარ, დავასრულოთ…

ნუგზარ ფუტკარაძე: მე ნაწილობრივ ყოველთვის დავეხმარები იმას, რა ქვია… მე ქალაქში შენაც და შენაც გამარჯობა უნდა გითხრა, იმასაც და იმასაც და ვინცხამ შენ მაი გითხრა – იმასაც. ალბათ ვიცნობ.

ბადრი: შევხვდებით აუცილებლად, მარა მე ამ შემთხვევაში ჩვენი პასუხი უნდა გქვონდეს კაცობის, რომ ძმობაში, ეს კაცი მზადაა, რომ ჩვენი პოზიცია გაიზიაროს.

ნუგზარ ფუტკარაძე: პოზიციას გავიზიარებ ბადრი, მე შენ გეუბნები, რომ ასე პირდაპირ ავდგე და მე ვთქვა, რომ აღარ ვარ თქვენთან და ვარ დამოუკიდებელი დეპუტატი, მაგას არ ვიტყვი. მაგრამ იქ, კანონების მიღების დროს, მე შამფურს არ დავწვავ.

ბადრი: რომ გეტყვის, ამაში, ამაში არ მიიღო მონაწილეობა, არ მიიღებ მონაწილეობას. ამა მეუბნები ხომ? დევილაპარაკოთ და შევხდეთ მერე. შენ წინააღმდეგი ხარ? რომ შევხდეთ?

ნუგზარ ფუტკარაძე: კანონების მიღების დროს ხელს არ ავწევ, რა გინდა მეტი. რათ უნდა მაგას შეხვედრა, მე იქაც ასე ვიტყვი. იქაც ასე ვიტყვი. რა გინდა, მე ცუდს არ გავუკეთებ არასდროს ვინმეს.

ბადრი: არა, მესმის. ცუდს არ გაუკეთებ, კი, გასაგებია, მაგრამ ამ შემთხვევაში პირდაპირი ინტერესი არის თემაში ხომ? პირდაპირი ინტერესია, რომ ამ შემთხვევაში ჩვენი პოზიცია გვქონდეს და ეს იმას არ ნიშნავს, რომ შენ ვიღაცას ზურგს აქცევ. ამიტომ, საერთოდ ჩემი გადასახედიდან, ასეა, რომ ნეიტრალში ხარ და ამ შემთხვევაში რომელ კანონსაც გინდა იმ კანონს, პირობითად, მხარს უჭერ და… ეს იყო კაციდან, რომ მე შენთან მეთხოვა ძმობაში და ის დაგიწერე კიდეც, რაც დასაწერი იყო [როგორც საუბრის კონტექსტიდან ჩანს, გარიგების სანაცვლოდ შეთავაზებული თანხის რაოდენობა ნუგზარ ფუტკარაძეს ფურცელზე დაუწერეს] და დანარჩენი გადავწყვიტოთ უნდა.

ვაჟა: ძმობაში გეუბნები, ნუგზარ, ბოლომდე მათქმევინე. 20 პროცენტს ჩვენ წამოვიღებთ, 80 პროცენტს… ძმობაში ვლაპარაკობ…

ნუგზარ ფუტკარაძე: არ მინდა, თლათ იყოს თქვენი.

ბადრი: არა, არა, ძმობაში, შენ რომ მოხვიდე, მეც იგივე პასუხს გაგცემ ძმობაში. ჩემთან გაქ საქმე ხომ?

ვაჟა: მე რატომ ამას ვამბობ, გამოვიარეთ ყველაფერი და ტყულაი შანსს ვაკარგავთ. და ის რაცხა იქნება, ჩვენში დარჩება ყველაფერი.

ნუგზარ ფუტკარაძე: მისმინე, მე კიდევ ერთხელ გეუბნები, მე არასდროს არ ვიტყვი, რომ დავტოვე ნაციონალური მოძრაობა და ვარ დამოუკიდებელი დეპუტატი. გამიგე? ამას არ ვიტყვი. მაგრამ მე კანონებში დევეხმარები იმ კაცს, ვინცხამ მაი გითხრენ. რა გინდა შენ.

ვაჟა: გავიგე.

ბადრი: მხარს დავუჭერ მაქსიმალურადო და იმ მხარეს ავწევ ხელსო. ეს თემა, მაგალითად… დამოუკიდებლობის პოზიცია ღალატს ნიშნავს? უნდა შეგეკითხო.

ნუგზარ ფუტკარაძე: კი,

ბადრი: რატომ, მითხარი?

ნუგზარ ფუტკარაძე: ერთად ვიყარეთ კენჭი ჩვენ, ერთ პარტიაში ვართ…

ბადრი: არა, არც იმ მხარეს ვარ და არც ამ მხარეს… გავბრაზდი და არ მინდა.

ვაჟა: მე აქ ვცხოვრობ, აქ დევიბადე, გევიზარდე. ჯანმრთელობა მე ხელს არ მიწყობს, არ მინდა არც ერთი მხარე ვაწყენინო, არც მეორე მხარეს, ამიტომ ვირჩევ დამოუკიდებელ დეპუტატობას…

ნუგზარ ფუტკარაძე: არა, მაგას არ ვიზამ. არ ვიტყვი მაგას. დამანებეთ თავი, მაგრამ რა გინდა, იმათ არ ვაწყენინებ, რა გინდა მეტი.

ბადრი: გასაგებია, მაგრამ არწყენა რაში გამოიხატება, მაგასაც დაკონკრეტება უნდა.

ნუგზარ ფუტკარაძე: მხარს დავუჭერ კანონებში და რაღა უნდა მეტი.

ბადრი: კაი, მივხვდით. ერთ შეხვედრას მაგ საქმეზე შევხვდებით. ვეტყვი, ასეა და მე ვიცი, რომ არც საქმეში და არც ურთიერთობაში რამეს არ დაგვამადლი და ეს მარტო ჩემ ინტერესებში არა, ორივეს ინტერესებშია, ხვალ შენ რომ მითხრა დამეხმარეო, უნდა დაგეხმარო, ხომ? მე ასე ვთვლი. უკან „ზადნი“ ხოდი არ ვიცი მე. ამიტომ იმ კაცმა რომ მომენდო, მეც შენ მოგენდე. იმან იცოდა, რომ შენ მომენდობოდი და არ მიღალატებდი და არც შენ მიღალატებდი.

ნუგზარ ფუტკარაძე: ჰოდა გიღალატე ახლა.

ბადრი: არ მიღალატე, მაგასაც გამოვასწორებ. ამ ეტაპზე ასეა, მერე ვნახოთ. ამ ეტაპზეა ასეა, ყველა კანონში მოგყვება, დამოუკიდბელობას, ცოტა დრო გევიდეს და მერე გადაწყვიტავს.

ნუგზარ ფუტკარაძე [სიცილით]: არა, არა… დამანებეთ თავი.

ვაჟა: გაფიცებ ბიჭო, მოვკვდი ამ გაჭირვებაში. დამიჯერე მე შენ, ეს ჩვენში მოკვდება.

ნუგზარ ფუტკარაძე: არა. მე მინდა ლამაზად დევიძინო, გევიღვიძო, გევიარო, გამევიარო, სადაც მინდა იქ მივდე, ყველასთან კარგად ვიყო.

ბადრი: ისეც მიხვალ და მოხვალ. შენ გინდა, რომ იმათმა არ თქვან, რატომ ნეიტრალური დეიჭირე, ჩვენი იმით იყარე კენჭიო. მარა პირველი ეტაპი მასე შეიძლება და მერე შეხედავ, თუ თემები, რაღაცა, მერე საფუძველიც გექნება რომ თქვა. დროის ამბავია. დროსაც მნიშვნელობა აქვს, რაფერ განვითარდება მოვლენები.

ვაჟა: დაფიქრდი და ძმობაში… იმის არ იყოს. ხანდახან ღმერთი რომ გადმოგიგდებს… ვინმეს კლავ?! ვინმეს რამე ჩათლახობას უკეთებ თუ რა არის. ყველაზე კაი სიტუაცია არის ნეიტრალურობა.

აუდიოჩანაწერის ავთენტურობა ჯერჯერობით დადასტურებული არ არის. შს სამინისტროში აცხადებენ, რომ ამ შემთხვევაზე გამოძიება არ დაწყეულა.

______________________

ფოტოზე პირველი – ნუგზარ ფუტკარაძე. დღეს „ერთიანმა ნაციონალურმა მოძრაობამ“ გაავცელა 2 ფოტო, რომელზეც, ენმ-ის განცხადებით, ვაჟა თაბაგიძე და ბადრი ბაკურიძე არიან გამოსახული. 

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com