თალიბანმა ავღანეთში სატელევიზიო არხებისთვის ახალი წესები გამოაქვეყნა, რომელთა თანახმად, ტელევიზიას არ შეუძლია აჩვენოს ტელესერიალები, რომელშიც მსახიობი ქალები მონაწილეობენ.
ასევე, ტელეარხის ჟურნალისტი ქალები არ შეიძლება ეკრანზე გამოჩნდნენ ჰიჯაბის გარეშე.
ახალი წესების გამო შესაძლოა ავღანეთში რამდენიმე ტელეარხი დაიხუროს, რადგან ტელევიზიების საეთერო ბადე ძირითადად უცხოური სერიალებითაა შევსებული, ამ სერიალებში კი მთავარ როლებს ქალები ასრულებენ.
თუმცა ტელევიზიებისთვის აკრძალვების ჩამონათვალი ამით არ მთავრდება.
ტელეარხებმა არ უნდა აჩვენონ ფილმები, რომლებიც, თალიბანის აზრით, ეწინააღმდეგება შარიათის პრინციპებს და ავღანურ ღირებულებებს; იკრძალება ავღანური და უცხოური ფილმების ჩვენება, რომლითაც ვრცელდება უცხოური კულტურა და „ამორალური ღირებულებები“; იუმორისტულმა გადაცემების შინაარსმა არავინ არ უნდა დაამციროს; არ შეიძლება ფილმების ან ვიდეოების ჩვენება, სადაც ნაჩვენებია ქალის ან მამაკაცის სხეულის ინტიმური ნაწილები და ა.შ.
