„გირჩი – მეტი თავისუფლების“ ბათუმის მერობის კანდიდატი გიორგი ფუტკარაძე ბათუმში, სუსის შენობასთან დააკავეს. გიორგი ფუტკარაძემ და ამ პარტიის ბათუმის ორგანიზაციის ხელმძღვანელმა, თემურ გორგაძემ, სუსის შენობასთან მიხეილ სააკაშვილის სამოქალაქო საავადმყოფოში გადაყვანის მოთხოვნით აქცია-პერფორმანსი გამართეს.
მათ სუსის შენობასთან გააჩერეს ავტომანქანა წარწერებით: „მიხეილ სააკაშვილი გადაიყვანეთ მრავალპროფილურ კლინიკაში”, „გაზაფხულზე ჩატარდეს რიგგარეშე არჩევნები“.
„გირჩი – მეტი თავისუფლების“ პრესსამსახურში აცხადებენ, რომ დაკავებულია თემურ გორგაძეც.
გიორგი ფუტკარაძეს ჯერ ავტომანქანის გაყვანა მოსთხოვეს, შემდეგ კი დააკავეს და ადგილზე ავტომობილის გასაყვანად ევაკუატორი გამოიძახეს. ამ დროს ავტომანქანაში იმყოფებოდა თემურ გორგაძე, მას კარი ჩაკეტილი ჰქონდა.
სუსის შენობასთან „გირჩი – მეტი თავისუფლება“ აქციას თბილისშიც მართავს. იქ პოლიციამ ავტომანქანაში მყოფი პარტიის ლიდერი, დეპუტატი ზურაბ-გირჩი ჯაფარიძე ევაკუატორით გადაიყვანა.
დღეს, 12 საათიდან, „გირჩი – მეტი თავისუფლების“ წარმომადგენლებმა 6 ქალაქში სახელმწიფო უსაფრთხოების სამსახურის შენობებთან ავტომანქანები გააჩერეს. ავტომანქანების საქარე მინებზე პლაკატები აქვთ წარწერებით – “სრულად პროპორციული”, “რიგგარეშე არჩევნები გაზაფხულზე” და ასევე “კომენტარს არ ვაკეთებ, მიმართეთ პრესსამსახურს”.
პარტიის წარმომადგენლები საქართველოს ყოფილი პრეზიდენტის, მიხეილ სააკაშვილის სამოქალაქო კლინიკაში გადაყვანასაც ითხოვდნენ.
