მთავარი,სიახლეები

ვეგანების გზამკვლევი ბათუმში

01.11.2021 • 2407
ვეგანების გზამკვლევი ბათუმში

წარმოუდგენლად (ალბათ, ეს სიტყვა ყველაზე მეტად ამ შემთხვევას უხდება) დიდ სამყაროში დღემდე არსებული ცნობებით სიცოცხლე მხოლოდ ჩვენს პლანეტაზე, დედამიწაზე გვხვდება. ეს სიცოცხლის, როგორც ასეთისადმი ბევრ კითხვას აჩენს. 

რა არის სიცოცხლე? რაზე ან ვისზე ვამბობთ, რომ ის არის ცოცხალი? 

ამ კითხვებზე მეცნიერები, რელიგიური ჯგუფები თუ ცალკეული ადამიანები სხვადასხვა პასუხს გაგცემენ და უმეტესი მათგანი, ალბათ, მართალიც იქნება. 

ამ სტატიაში ნამდვილად ვერ შევძლებთ მათი მსჯელობების შეგროვებას და ანალიზს, თუმცა შევეცდებით ერთი ძალიან რადიკალური და რევოლუციური ხედვა – ვეგანიზმი მიმოვიხილოთ. 

დღეს ვეგანიზმი ყველაზე მეტს ამბობს სიცოცხლეზე და ხდის ამ დისკუსიას პოპულარულს როგორც სამზარეულოში, ისე საჯარო და აკადემიური სივრცეებში. ვეგანები უარს ამბობენ ცხოველური პროდუქტით ( ხორცი, თევზი, კვერცხი, რძის პროდუქტი, თაფლი) კვებაზე, ასევე ტყავის, ბეწვის გამოყენებაზე და ისეთი კომპანიების მხარდაჭერაზე, რომლებიც ცხოველებზე ცდიან თავიანთ პროდუქციას ან მათგან რამეს ამზადებენ.

დიახ, ვეგანები ამბობენ, რომ სამყაროს შეცვლა სამზარეულოდან იწყება. რატომ მოხდა ის, რომ ადამიანებმა საკვების მიღება, ასე ვთქვათ, დააკორექტირეს და შეუსაბამეს მათ ეთიკურ და მორალურ და, ასევე, პოლიტიკურ მიმართებებს?

პასუხისთვის თავდაპირველად უნდა განვმარტოთ, რომ ძირითადად ადამიანები ვეგანები ხდებიან 3 მიზეზის გამო:

  1. ჯანმრთელობის შესაბამისი კვების სტილი: მიიჩნევენ რა, რომ ვეგანური კვება უკეთესია მათი ჯანმრთელობისთვის.
  2. ცხოველების დაცვა: ცხოველების ტანჯვისა და დახოცვისგან, ექსპერიმენტებში ჩართვისგან ხსნა
  3. დედამიწაზე ზრუნვა: ხორცის წარმოება ორჯერ უფრო მეტ დაბინძურებას იწვევს, ვიდრე მცენარეული საკვების წარმოება.

წყარო: გარდიანი. შენიშვნა – მანიოკი მცენარეა, რომელსაც ვეგანურ კვებაში იყენებენ

თუმცა ამ სამ მიზეზს შეიძლება მივუმატოთ მეოთხეც – ვეგანი პოლიტიკური შეხედულებებიდან გამომდინარე. ადამიანები, რომლებიც ვეგანობას იდეოლოგიურ ჭრილში უყურებენ, ფიქრობენ, რომ ეს არის მოძრაობა ექსპლუატაციის, ჩაგვრის, ერთის მიერ მეორეს თავის სასიკეთოდ გამოყენების წინააღმდეგი, “სრული გათავისუფლების” იდეა, რომელიც მოიცავს ადამიანს და სხვა ყველა დანარჩენ ცხოველს ერთად.

  • რა/სად უნდა ჭამოს ვეგანმა ბათუმში?

როგორც გავარკვიეთ, ბათუმში პირველი ვეგანური, სოიოს ნაყინი დაახლოებით 20 წლის წინ გამოჩნდა. ამ მსუბუქმა, იაფმა და გემრიელმა ნაყინმა მალე მოინადირა ბათუმელების გულები და მოდით, ბათუმის ვეგანურ მხარეზე საუბარიც ამ პროდუქტზე საუბრით დავიწყოთ.

ტოფუ და სოიოს ნაყინი

ქუთაისის ქუჩის ბოლოს, სკვერში გაჩერებული ავტომანქანიდან ნაყინთან ერთად შეგიძლიათ ტოფუს, იგივე სოიოს ყველის შეძენა და დაგემოვნებაც. ტოფუს სოიოს ყველს ეძახიან დამზადების მსგავსი ტექნოლოგიის გამო: სოიოსგან ჯერ რძეს იღებენ, ამ რძისგან კი, ასე ვთქვათ, ყველი ამოჰყავთ.

ქუთაისის ქუჩას ევროპის მოედნისკენ თუ გაუყვებით, გზად ბევრ რესტორანს შეხვდებით ანატოლიურ/ახლო-აღმოსავლურ სტილში. ვეგანებისთვის ამ ქუჩას უგემრიელესი ჩორბები და ჰუმუსი მოაქვს, ხშირად ჩაიც (უფასოდ).

ჩემი აზრით, ადამიანები ორ ნაწილად იყოფიან: 1. ვისაც წითელი ჩორბა ანუ “ეზოგელინი” უყვარს და 2. ვისაც თეთრი ჩორბა ანუ “მერჯიმექ ჩორბა” უყვარს. (რა თქმა უნდა, სახელდება სრულიად ქუთაისის ქუჩის გამოცდილებას ეყრდნობა და პრეტენზია არ აქვს უნივერსალურობასთან დაკავშირებით).

ამ ორივე წვნიანის მთავარი ინგრედიენტი არის ოსპი და მისი მრავალფეროვნება.

ჩორბა

ბათუმში ასევე უკვე არის ლიბანური და ებრაული კაფეები. მათ შორის “Haba Eat”, სადაც ვეგანებისთვის ტოპ-მნიშვნელობის ფალაფელის დაგემოვნება აჭარული ხაჭაპურის ფორმით შეგიძლიათ. ფალაფელი მუხუდოსგან დამზადებული ერთგვარი კატლეტებია.

ფალაფელი ჰაბა-ითის მენიუდან

  • პირველი სრულად ვეგანური კაფე ბათუმში

ამ ზაფხულს ბათუმში, მელიქიშვილის ქუჩაზე, პირველი ვეგანური კაფე – „Go Vegan Cafe“ გაიხსნა. მარია და ვიქტორია ბელარუსიდან ჩამოვიდნენ ბათუმში. პროფესიით მზარეულები არიან და გადაწყვიტეს, ვეგანური კაფე გაეხსნათ:

„სამ წელზე მეტი გავიდა, რაც ვეგანი ვარ. მყავს ვეგეტარიანელი მეგობარი. ის ხშირად საუბრობდა ვეგანიზმზე და დავინტერესდი, როგორი იყო ხორცის გარეშე ცხოვრება. თავიდან ეს განა ინტერესის გულისთვის იყო, უბრალოდ ვცადე, შემდეგ უფრო მეტს ვკითხულობდი, სხვადასხვა ლიტერატურას  ვეცნობოდი, ვეძებდი ინფორმაციას ინტერნეტში და გავიგე, რომ საერთოდაც, არასწორია, რომ ხორცს ვჭამთ და თავდაპირველად ვეგეტარიანელი გავხდი, რაღაც დროის შემდეგ კი ბოლომდე ვთქვი უარი ცხოველური წარმოშობის  პროდუქტებზე და ვეგანი გავხდი,“ – ამბობს ვიქტორია კოსტიუკევიჩი.

„Go Vegan Cafe“-ში შეგიძლიათ მრავალფეროვანი ვეგანური საკვებით დანაყრება – როგორც სალათებით, ვეგანური შაურმებით და ბურგერებით, ისე დესერტითა და ვეგანური რძის ბაზაზე დამზადებული ყავით.

მინსკშიც როცა ვცხოვრობდით, ასეთი სიტუაცია იყო: მიდიხარ ჩვეულებრივ რესტორანში, უყურებ მენიუს და მარტო სალათის შეკვეთა შეგიძლია ან შემწვარ ბოსტნეულს გთავაზობენ. კარგი იქნებოდა, ჩვეულებრივ რესტორნებსაც ეფიქრათ, რომ მათთან შეიძლება მიდიოდნენ სტუმრები, ვინც ვეგანურად იკვებება და თავიანთი მენიუ უფრო მრავალფეროვანი გახადონ.

21-ე საუკუნეში ვცხოვრობთ და არ გვჭირდება ცხოველების მოკვლა გამოკვებისთვის, ახლა იმდენი რამის მოფიქრებაა შესაძლებელი. ქვის ხანაში, შესაძლოა, ეს აუცილებლობა იყო გადარჩენისთვის, მაგრამ ახლა ბუნება თავად გვაძლევს ყველა პროდუქტს და არაა საჭირო არავის მოვკლა,“ – ამბობს ვიქტორია.

ვიქტორია კოსტიუკევიჩი

  • უშაქრო, მაგრამ მაინც ტკბილი ვეგანური ბურთულები | რეცეპტი

პირველი ნოემბერი ვეგანების საერთაშორისო დღეა. ამის აღსანიშნავად გთავაზობთ ვეგანური, უმი და უმარტივესი დესერტის რეცეპტს:

ინგრედიენტების სია ასეთია:

[checklist]

  • 100 გრამი თხილი
  • 50 გრამი ნიგოზი ან მიწის თხილი
  • 10-12 ცალი ფინიკის ჩირი (თუ უფრო ტკბილი გემოები გიყვართ, შესაძლებელია ფინიკის რაოდენობის გაზრდაც)
  • 3 სუფრის კოვზი კაკაო
  • 2 კოვზი ქოქოსის ფანტელი
  • ვანილი/დარიჩინი გემოვნებით

[/checklist]

ყველა ინგრედიენტი მოათავსეთ ბლენდერში, დააბლენდერეთ ერთგვაროვანი მასის მიღებამდე, გადმოიღეთ თასში და ხელისგულებით დაამრგვალეთ, შუაში შეიძლება ნუში ან სხვა თხილეულის ჩაყოლებაც.

გემრიელად მიირთვით!

გადაბეჭდვის წესი


ასევე: