Batumelebi | ანზორ ბოლქვაძე მუქარაზე: „მაგას ტელეფონი დარჩა ჩართული, ვუთხარი, ნუ იგინები-მეთქი“ ანზორ ბოლქვაძე მუქარაზე: „მაგას ტელეფონი დარჩა ჩართული, ვუთხარი, ნუ იგინები-მეთქი“ – Batumelebi
RU | GE  

ანზორ ბოლქვაძე მუქარაზე: „მაგას ტელეფონი დარჩა ჩართული, ვუთხარი, ნუ იგინები-მეთქი“

„ეს არ იყო მუქარა,“ – ამბობს ანზორ ბოლქვაძე რამაზ შავაძის შესახებ, რომელმაც დღეს, 14 სექტემბერს ხულოს, შუახევის, ქედისა და ხელვაჩაურის დეპუტატი პარლამენტში – ანზორ ბოლქვაძე მუქარაში დაადანაშაულა. რამაზ შავაძე ოპოზიციური ერთობის მაჟორიტარობის კანდიდატია ხულოს სოფლებში – რიყეთსა და დიოკნისში. მისი თქმით, ანზორ ბოლქვაძე მას სიცოცხლის მოსპობით დაემუქრა და კანდიდატურის მოხსნა მოსთხოვა.

„როცა საუბარი მასთან დავასრულე, მაგას ტელეფონი დარჩა ჩართული, ლაპარაკობდა მისით, მაგას რა აქვს გაკეთებულიო და დედა შემაგინა… მომეშალა ნერვები, დავურეკე და ვუთხარი, მასეთი ლაპარაკისთვის ვინმე თავს გაგიჭეჭყავს-მეთქი. ადგა და ეს გამოიყენა, აფიორა ადამიანია,“ – ამბობს „ბათუმელებთან“ ანზორ ბოლქვაძე.

ანზორ ბოლქვაძის თქმით, ის მაჟორიტარობის კანდიდატს არ დამუქრებია.

„ეს არ არის მუქარა. მაგას რა აქვს დასამუქრებელი, ან ცხოვრებაში ვის დავემუქრე? დედის დაგინებას მე არავის არ ვაპატიებ… მუქარა რომ ყოფილიყო, ცხვირი უკანა მხარეს ექნებოდა და ყურები ქვედა მხარეს,“ – აღნიშნა ანზორ ბოლქვაძემ „ბათუმელებთან“.

ანზორ ბოლქვაძე ასევე ადასტურებს, რომ 2009 წელს ჩართული იყო რამაზ შავაძის გათავისუფლების პროცესში. ამ დროს რამაზ შავაძე დიოკნისის გამგებელი იყო.

„დავეხმარე კიდეც და ეს იუკადრისა… მე პროკურატურას მივწერე, კანონიერების ფარგლებში დაეხმარეთ-მეთქი და დაეხმარენ,“ – დასძინა ანზორ ბოლქვაძემ.

ნეტგაზეთის მასალების სხვა გამოცემებში გადაბეჭდვის წესი
ავტორი