„შეზღუდვების შემსუბუქების საფუძველი არ გვაქვს. სიტუაცია არის საკმაოდ რთული. კლინიკები გადატვირთულია. თითქმის 8 700-მდეა მობილიზებული საწოლების რაოდენობა, მაქსიმალური დატვირთვით მუშაობს სექტორი. ამიტომ ყველა ის რეგულაცია, რომელიც ძალაშია, უნდა აღსრულდეს მაქსიმალური სიმკაცრით,“ – განაცხადა ჯანდაცვის მინისტრის მოადგილემ, თამარ გაბუნიამ საკოორდინაციო საბჭოს სხდომის დასრულების შემდეგ.
მინისტრის მოადგილის თქმით, დღევანდელი მონაცემი აჩენს იმედს, რომ სიტუაცია ნელ-ნელა სტაბილიზაციისკენ მიდის.
„არის გარკვეული სტაბილიზაციის ნიშნები, ჩვენ პიკი გარკვეულწილად გადავიარეთ და ახლა დაიწყება დაღმასვლის ეტაპი. მაგრამ აქ მთავარია ის, თუ რამდენად სწრაფად მოხდება დაღმასვლა. პრევენციული ღონისძიებები, რომელიც აქამდე გვქონდა ჩატარებული, ახლა არანაკლებ მნიშვნელოვანია, რადგან არ მოხდეს კიდევ ესკალაცია.
რაც შეეხება გარდაცვალების შემთხვევებს, ვიცით, რომ გარდაცვალების შემთხვევების კვლევას სჭირდება გარკვეული პერიოდი, დაახლოებით 2 კვირა არის ის პერიოდი, როდესაც შემთხვევების სტაბილიზაციას შემდეგ უკვე მოჰყვება გარდაცვალების სტაბილიზაცია.
ჩვენი მოლოდინიც ასეთია, რომ ოქტომბრის დასაწყისი მშვიდი უნდა იყოს, მაგრამ მანამდე მოგვიწევს საკმაოდ სერიოზული პერიოდის გავლა,“ – თქვა თამარ გაბუნიამ.
თამარ გაბუნიას თქმით, კლინიკები როტაციის პრინციპით ცდილობენ გაუმკლავდნენ ექიმებისა და ექთნების გადაღლილობას.
___
ბოლო 24 საათის განმავლობაში საქართველოში 78 ადამიანი გარდაიცვალა კოვიდით, მათ შორის აჭრაში 8. ჯანდაცვის სამინისტრო გარდაცვალების კლების ტენდენციას შემდეგი ორი კვირა არ ელოდება.
30 აგვისტოს მდგომარეობით, კოვიდით ქვეყანაში სულ 7 329 ადამიანია გარდაცვლილი.
