„გვაქვს შერჩეული ლოკაციები, რომლებიც შეესაბამება საველე ჰოსპიტლების პირობებს და ამასთანავე ვიცით, რომელი ექიმები შეძლებენ დიდი რაოდენობით პაციენტების მართვას“ – განაცხადა დღეს, 12 აგვისტოს, აჭარის მთავრობაში გამართულ ბრიფინგზე საქართველოს ჯანდაცვის მინისტრმა ეკატერინე ტიკარაძემ.
ტიკარაძის თქმით, სამინისტროს საველე ჰოსპიტლები კარვის ტიპის არ წარმოუდგენია და მიაჩნიათ, რომ საველე ჰოსპიტლებში უზრუნველყოფილი უნდა იყოს მაქსიმალური კომფორტი და უსაფრთხოება.
მინისტრის თქმით, აჭარაში 200-მდე ექიმი და 300-მდე ექთანია მობილიზებული კოვიდსიტუაციასთან გასამკლავებლად.
როგორც ტიკარაძე ამბობს, ამჟამად საქართველოში კოვიდის 48 ათასამდე აქტიური შემთხვევა იმართება, 38 ათას ინფიცირებულს ოჯახის ექიმები ბინაზე ზედამხედველობენ.
მინისტრის ინფორმაციით, ქვეყანაში ჯამში 8000 საწოლია კოვიდინფიცირებულებისთვის, მათგან 500-მდე საწოლი ამჯერად თავისუფალია, თუმცა, მისივე თქმით, ეს რიცხვი ყოველდღიურად იცვლება.
„საკოორდინაციო საბჭოს გადაწყვეტილებით დღეს ახალი შეზღუდვების შესახებ გაიგო საზოგადოებამ, რაც გვაიმედებს, რომ აღმავალი ინფექცია დაიძლევა და შევძლებთ მდგომარეობა გავხადოთ სტაბილური“ – განაცხადა ჯანდაცვის მინისტრმა.
ამავე თემაზე:
https://batumelebi.netgazeti.ge/news/359999/
