მთავარი,სიახლეები

ბათუმის მერია 950 000 ლარად ტრენაჟორებს იყიდის და 45 ადგილზე დაამონტაჟებს

29.07.2021 • 2355
ბათუმის მერია 950 000 ლარად ტრენაჟორებს იყიდის და 45 ადგილზე დაამონტაჟებს

ბათუმის ბიუჯეტიდან ტრენაჟორების შესაძენად 950 ათასი ლარია გამოყოფილი. სპორტული ტრენაჟორების შეძენა-მონტაჟზე მერიის საქალაქო ინფრასტრუქტურისა და კეთილმოწყობის სამმართველომ ტენდერი უკვე გამოაცხადა.

ტენდერში წინადადებების მიღება 2021 წლის 25 აგვისტოს დაიწყება და 30 აგვისტოს დასრულდება.

საქონლის მიწოდება და მონტაჟი კი, 2021 წლის 30 ნოემბრის ჩათვლით უნდა განხორციელდეს.

 

პირობის მიხედვით, „მიმწოდებელი პასუხისმგებლობას იღებს, შესყიდვის ობიექტის დაუზიანებლობაზე [გარდა ვანდალიზმის შემთხვევებისა], მიღება-ჩაბარების აქტის გაფორმებიდან არანაკლებ 1 წლის განმავლობაში.

„საგარანტიო ვადის განმავლობაში, შესყიდვის ობიექტის დაზიანების ან/და რაიმე წუნის აღმოჩენის შემთხვევაში, თუ აღმოჩნდა, რომ წუნი გამოწვეულია მიმწოდებლის ბრალეულობით, მიმწოდებელი ვალდებულია შეტყობინების მიღებიდან, გამოასწოროს წარმოქმნილი ნაკლოვანება/დეფექტი საკუთარი ხარჯებით ან/და უზრუნველყოს შესყიდვის ობიექტის შეკეთება ან ჩანაცვლება ახლით, შემსყიდველის მოთხოვნიდან არაუგვიანეს 10 დღეში“ – აღნიშნულია ტენდერის პირობაში.

ტენდერში მოცემულია შესასყიდი ტრენაჟორების ტექნიკური მახასიათებლებიც, თუმცა აღნიშნულია ასევე, რომ „დასაშვებია სხვა ტიპის ტრენაჟორის გამოყენებაც, იმ შემთხვევაში, თუ მისი ტექნიკური მონაცემები [როგორც ტექნიკური, ასევე ესთეტიკური თვალსაზრისით] ნაკლები არ იქნება მითითებული ტრენაჟორის ტექნიკურ მონაცემებზე“.

2020 წელს კოვიდპანდემიის გამო, მაგალითად, ბათუმის ბულვარმა, სავარჯიშო სპორტული ტრენაჟორებით სარგებლობა გარკვეული პერიოდით აკრძალა.

ბოლო წლებში საჯარო უწყებები ძირითადად რუსული წარმოების ტრენაჟორებს ყიდულობენ. რუსული პროდუქციის შეძენაზე, „საერთაშორისო გამჭვირვალობა საქართველომ“ კვლევაც კი გამოაქვეყნა და განაცხადა, რომ „ცვლილებები უნდა შევიდეს სახელმწიფო შესყიდვების საკანონმდებლო ბაზაში, რომელიც გარკვეულ შეზღუდვებს დააწესებს რუსული წარმომავლობის [როგორც ოკუპანტი ქვეყნის] პროდუქციის შესყიდვაზე“.

ამავე თემაზე „ბათუმელების“ არქივიდან:

გაჯანსაღება რუსული ტრენაჟორებით – 5 წელში ბიუჯეტიდან 13,3 მილიონი დაიხარჯა

 

 

გადაბეჭდვის წესი


ასევე: