Batumelebi | „შეწყდეს საპატრიარქოს დაფინანსება ჩვენი გადასახადებით“ – პეტიცია „შეწყდეს საპატრიარქოს დაფინანსება ჩვენი გადასახადებით“ – პეტიცია – Batumelebi
ნეტგაზეთი • RU

„შეწყდეს საპატრიარქოს დაფინანსება ჩვენი გადასახადებით“ – პეტიცია

საქართველოს მოქალაქეები პეტიციით მიმართავენ საქართველოს მთავრობასა და პარლამენტს და მოქალაქეების მიერ გადახდილი გადასახადებით საპატრიარქოს დაფინანსების შეწყვეტას ითხოვენ.

„2021 წლის 5 ივლისს მომხდარ მასობრივ ძალადობას, რომელიც საპატრიარქოს ხელშეწყობით გაიმართა, ტრაგიკული დასასრული აქვს, დაშავებულია 50-ზე მეტი ჟურნალისტი და გარდაცვლილია ტელეკომპანია პირველის ოპერატორი ლექსო ლაშქარავა, რომელიც მიმდინარე მოვლენებს აშუქებდა.

ცნობილია, რომ საპატრიარქო ბიუჯეტიდან ფინანსდება 25 მილიონით, ასევე ფლობს რამდენიმე ათეულ ბიზნესს, რომლებიც გათავისუფლებულები არიან სხვადასხვა გადასახადებისგან.

აღმოჩნდა, რომ საპატრიარქო, რომელიც ჩვენი გადახდილი გადასახადებით ფინანსდება ჩვენ წინააღმდეგ განაწყობს რადიკალურად განწყობილ მის მრევლს, რომლებიც სახიფათოები არიან ჩვენი და ჩვენი შვილებისთვის.

ჩვენ, ხელის მომწერები მოვითხოვთ, შეწყდეს საპატრიარქოს დაფინანსება ჩვენ მიერ გადახდილი გადასახადებით,“ – ვკითხულობთ პეტიციაში.

პეტიციას ამ დროისათვის 2600-ზე მეტი ადამიანი აწერს ხელს.

„ტოლერანტობისა და მრავალფეროვნების ინსტიტუტის“ 2020 წელს გამოქვეყნებული ანგარიშის თანახმად, 2002 წლიდან 2019 წლამდე ეკლესიამ ბიუჯეტიდან 276.5 მილიონი ლარი მიიღო, საპატრიარქოსთვის გადაცემული უძრავი ქონება კი, ჯამში, 64 კვ.კმ. ფართობს მოიცავს.

ნეტგაზეთის მასალების სხვა გამოცემებში გადაბეჭდვის წესი
ავტორი
ნანა კვაჭაძე, ჟურნალისტი ელფოსტა: kvachadze.n@gmail.com