ირაკლი კობახიძემ 18-დან 31 აგვისტოს ჩათვლით რამდენიმე განკარგულება გამოსცა, რომელთა თანახმადაც ეკლესიას ქონება და ფული გადასცა.
კერძოდ, 18 აგვისტოს გამოცემული განკარგულების თანახმად, კობახიძემ აბაშაში, სოფელ კეთილარის ადმინისტრაციულ ერთეულში არსებული 384 კვ/მ არასასოფლო-სამეურნეო დანიშნულების მიწის ნაკვეთი და მასზე განთავსებული შენობა-ნაგებობები პირდაპირი მიყიდვის ფორმით, 1 ლარად გადასცა ეკლესიას.
იმავე დღეს გამოცემული კიდევ ერთი განკარგულებით ირაკლი კობახიძემ სამტრედიის მუნიციპალიტეტში, ნაბაკევში, 3 739 კვ/მ არასასოფლო-სამეურნეო დანიშნულების მიწის ნაკვეთი და მასზე განთავსებული შენობა-ნაგებობები პირდაპირი მიყიდვის ფორმით, 1 ლარად გადასცა საკუთრებაში ეკლესიას.
21 აგვისტოს გამოცემული განკარგულებით კი დაბა სურამში მდებარე კოლეჯ „ქართლს“ უფლება მისცა კუთვნილი ქონება, აუქციონის გარეშე, უსასყიდლოდ ათხოვოს საპატრიარქოს წმინდა დიმიტრი ყიფიანის სახელობის სკოლას. განისაზღვრა დროც – სამუშაო დღეებში სკოლას 08:00-დან 14:15 საათამდე შეუძლია შენობით სარგებლობა.
25 აგვისტოს გამოცემული განკარგულებით, საქართველოს მართლმადიდებლურ ეკლესიას 42 წლის ვადით, უსასყიდლო აღნაგობის უფლებით გადასცეს სახელმწიფო საკუთრებაში არსებული მიწის ნაკვეთი თბილისში, სიმონ კანდელაკის ქუჩაზე, მასზე განთავსებული შენობა-ნაგებობებით.
ასევე, 31 აგვისტოს გამოცემული განკარგულებით, 5 მილიონი ლარით დააფინანსეს საქართველოს საპატრიარქოს მიერ დაფუძნებული ზოგიერთი დაწესებულება.
განკარგულების დანართის თანახმად, 5 მილიონი ლარი გადანაწილდება საპატრიარქოს მიერ დაფუძნებულ 42 სასწავლებელზე. თითოეული დაწესებულება თანაბრად მიიღებს 40 ათას ლარს.
