ხულოში, სოფელ გორგაძეებში ორი სახლი და ბოსელი დაიწვა. ცეცხლი ერთ სახლში გაჩნდა 11 ივლისს, დილის 5 საათზე და მეორე სახლსაც მოედო.
„8 სული გარეთ ვართ, ყველაფერი დამწვარია, არ ვიცით, რის გამო გაჩნდა ხანძარი, სახანძრო 40 წუთის მერე მოვიდა, დაიწვა ჩემი სახლი და ბოსელი მთლიანად, ჩემი ბიძაშვილის სახლიც თითქმის დამწვარია,“ – ამბობს „ბათუმელებთან“ ბეჟან გორგაძე.
ხულოს მერის ვახტანგ ბერიძის თქმით, ოჯახებს უსაფრთხო ადგილას მალე გადაიყვანენ ქირით, ხოლო შემდეგ თითოეულ ოჯახს 15 ათას ლარს მისცემენ.
დაზარალებული ოჯახის ადვოკატი თემურ ქავშბაია არ გამორიცხავს, ხანძარი სახლს ხელოვნურად გაუჩინეს, რადგან ბეჟან გორგაძესთან დაპირისპირებულმა პირმა ივნისის დასაწყისში ამავე ოჯახის სახლი ბახმაროში დაშალა.
სახლის დაშლის ფაქტზე გამოძიება დაიწყო, თუმცა ამ დრომდე არავინ დაუკავებიათ.
„მტკიცებულებების არსებობის მიუხედავად არავინ დაუკავებიათ. საქმეს ოზურგეთის პროკურატურა იძიებს. სავარაუდო დამნაშავეებს ოზურგეთის პროკურორი მალხაზ სირაძე მფარველობს და ისინი არც მალავენ ამას,“ – გვითხრა ადვოკატმა თემურ ქავშბაიამ.
